پاکستان کا آئین مذہبی آزادی اور بنیادی حقوق کی مکمل ضمانت دیتا ہے،صدر

صدرِ مملکت آصف علی زرداری نے کہا ہے کہ پاکستان کا آئین مذہبی آزادی اور بنیادی حقوق کی مکمل ضمانت دیتا ہے۔

یومِ برداشت کے موقع پر بین الاقوامی برادری کے ساتھ یکجہتی کا اظہار کرتے ہوئے صدر زرداری نے کہا کہ پاکستان رواداری، امن اور باہمی احترام کے فروغ کے لیے پُرعزم ہے۔ انہوں نے مزید کہا کہ اسلام انسانیت، شفقت اور عدل کا درس دیتا ہے اور حکومت سماجی و مذہبی استحصال کے خاتمے کے لیے کوشاں ہے۔

صدرِ پاکستان نے واضح کیا کہ غیر مسلم شہریوں کے حقوق کا تحفظ ہماری ترجیح ہے اور بین المذاہب ہم آہنگی پالیسی پر بھرپور عملدرآمد جاری ہے۔ انہوں نے نیشنل کمیشن فار مائنارٹیز رائٹس بل 2025 کو اس حوالے سے اہم پیشرفت قرار دیا۔