وفاقی آئینی عدالت میں مزید دو ججز نے حلف اٹھا لیا

وفاقی آئینی عدالت میں مزید دو ججز نے حلف اٹھا لیا ہے۔ جسٹس روزی خان اور جسٹس ارشد حسین شاہ نے وفاقی آئینی عدالت کے جج کے طور پر حلف برداری کی۔

چیف جسٹس امین الدین خان نے دونوں ججز سے حلف لیا، جبکہ تقریب حلف برداری اسلام آباد ہائی کورٹ کے کانفرنس روم میں منعقد ہوئی۔

واضح رہے کہ اس سے قبل جسٹس حسن اظہر رضوی، جسٹس عامر فاروق، جسٹس علی باقر نجفی اور جسٹس کے کے آغا نے بھی وفاقی آئینی عدالت میں بطور جج حلف اٹھا چکا ہے، جس کے بعد چیف جسٹس سمیت اب وفاقی آئینی عدالت کے سات ججز مکمل ہو چکے ہیں۔

دوسری جانب اسلام آباد ہائی کورٹ بلڈنگ میں آئینی عدالت کے ججز کے لیے کورٹ رومز کی منتقلی کا عمل جاری ہے۔ چیف جسٹس اسلام آباد ہائی کورٹ سرفراز ڈوگر بدستور کورٹ ون میں سماعت کریں گے، جبکہ چیف جسٹس آئینی عدالت جسٹس امین الدین خان کورٹ نمبر 2 میں بیٹھیں گے۔ جسٹس عامر فاروق اور جسٹس حسن اظہر رضوی سینکڈ فلور پر اپنی عدالتیں قائم کریں گے۔

اسلام آباد ہائی کورٹ کے جسٹس محمد آصف اور جسٹس خادم حسین سومرو کی عدالتیں بھی سینکڈ فلور پر قائم ہیں، تاہم آج ان کی کاز لسٹ منسوخ کر دی گئی ہے۔