وفاقی وزیر داخلہ محسن نقوی سے چین کے سفیر جیان زیڈونگ کی ملاقات

اسلام آباد: پاکستان اور چین نے انسدادِ دہشت گردی اور سکیورٹی تعاون کو مزید مضبوط بنانے پر اتفاق کیا ہے۔

وفاقی وزیر داخلہ محسن نقوی سے چین کے سفیر جیان زیڈونگ نے ملاقات کی، جس میں پاک-چین دوطرفہ تعلقات اور باہمی دلچسپی کے امور پر تبادلۂ خیال کیا گیا۔ چینی سفیر نے حالیہ خودکش حملے کی مذمت کرتے ہوئے قیمتی جانوں کے ضیاع پر تعزیت بھی کی۔ وزارتِ خارجہ کے ترجمان نے بھی اس واقعہ کی مذمت کی ہے۔

ملاقات کے دوران دونوں فریقین نے دہشت گردی کے خلاف تعاون کو بڑھانے اور سکیورٹی اقدامات کو مضبوط بنانے پر اتفاق کیا۔ وزیر داخلہ محسن نقوی نے کہا کہ پاک-چین تعلقات اعتماد اور احترام پر مبنی ہیں اور چین ہر مشکل وقت میں پاکستان کا معتبر دوست رہا ہے۔

چینی سفیر جیان زیڈونگ نے یقین دلایا کہ پاکستان کے ساتھ تعاون مسلسل جاری رہے گا۔