آزاد کشمیر،نومنتخب وزیر اعظم کی حلف برداری آج ہوگی

 

 آزاد کشمیر کے نومنتخب وزیر اعظم فیصل ممتاز راٹھور کی تقریب حلف برداری آج ایوان صدر مظفر آباد میں منعقد ہوگی۔ حلف برداری میں شرکت کے لیے پیپلز پارٹی کی رہنما فریال تالپور مظفر آباد پہنچ چکی ہیں جبکہ چیئرمین بلاول بھٹو زرداری کی شرکت کا بھی امکان ہے۔

گزشتہ روز وزیر اعظم آزاد کشمیر چوہدری انوار الحق کے خلاف تحریک عدم اعتماد کامیاب ہوئی جس کے بعد فیصل ممتاز راٹھور کو وزارت عظمیٰ کے لیے 36 ووٹ ملے، جبکہ مخالفت میں صرف 2 ووٹ ڈالے گئے۔ پیپلز پارٹی نے تحریک عدم اعتماد کے لیے 38 ارکان کی حمایت کا دعویٰ کیا تھا۔

ایوان سے الوداعی خطاب میں سابق وزیر اعظم چوہدری انوار الحق نے کہا کہ تمام ذمہ داری ایک شخص پر ڈالنا درست نہیں، کابینہ کے ارکان بھی فیصلوں میں شریک ہوتے ہیں۔ انہوں نے کہا کہ سیاسی نظام تب ہی محفوظ رہ سکتا ہے جب ملکی سرحدیں محفوظ ہوں، اور پاکستان کی مسلح افواج نہ ہوں تو کچھ بھی باقی نہیں بچے گا۔

نومنتخب وزیر اعظم فیصل ممتاز راٹھور نے خطاب میں کہا کہ ایکشن کمیٹی ایک حقیقت ہے، ان کے کچھ مطالبات جائز جبکہ کچھ خواہشات پر مبنی ہیں۔ انہوں نے کہا کہ عوامی مسائل کے حل کے لیے عملی اقدامات کیے جائیں گے۔