بنکرنگ کے لیے پاکستان میں تاریخ کا پہلا لائسنس جاری

 

 وفاقی وزیر برائے بحری امور محمد جنید انوار چوہدری نے اعلان کیا ہے کہ پاکستان میں بنکرنگ کے لیے تاریخ کا پہلا لائسنس جاری کر دیا گیا ہے۔

انہوں نے بتایا کہ کراچی پورٹ پر پہلی عالمی معیار کی بنکرنگ سروس کا آغاز ہو گیا ہے، اور متعدد بین الاقوامی کمپنیوں نے لائسنس کے لیے دلچسپی ظاہر کی ہے۔ مستقبل میں اس سے پورٹس سے اربوں روپے کی آمدنی متوقع ہے۔

محمد جنید انوار چوہدری نے کہا کہ بنکرنگ سروس وزیراعظم کی خصوصی ہدایات پر شروع کی گئی ہے، جس کے تحت جہازوں کو بین الاقوامی معیار کا فیول سپلائی نظام دستیاب ہوگا۔

وفاقی وزیر نے مزید بتایا کہ عالمی معیار کی بنکرنگ سے کراچی پورٹ کی علاقائی مسابقت بڑھے گی، غیرملکی شپنگ لائنز کی آمد بڑھے گی، اور آپریشنز سے قیمتی زرمبادلہ حاصل ہوگا۔

انہوں نے کہا کہ کراچی پورٹ میں عالمی حفاظتی اور آپریشنل اسٹینڈرڈز نافذ کیے گئے ہیں۔ نئی سروس سے مرمت، سپلائز اور میری ٹائم لاجسٹکس کے شعبے میں روزگار کے مواقع بڑھیں گے، جبکہ ایندھن کے معیار، دستاویزات اور شفافیت پر عالمی اصولوں کی مکمل پابندی ہوگی۔