آزاد کشمیر کی 20 رکنی کابینہ آج ایوانِ صدر مظفرآباد میں حلف اٹھائے گی

 

آزاد جموں و کشمیر کی 20 رکنی نئی کابینہ آج ایوانِ صدر مظفرآباد میں حلف اٹھائے گی۔ نومنتخب وزیراعظم فیصل ممتاز راٹھور اس تقریب میں شرکت کریں گے۔ سابق وزیراعظم چوہدری انوار الحق کی کابینہ میں وزیر قانون رہنے والے میاں عبدالوحید کو نئی کابینہ میں سینیئر وزیر کا منصب دیا جائے گا۔ نئی حکومت کی کابینہ میں 18 وزرا اور 2 مشیر شامل ہیں۔

سرکاری ذرائع کے مطابق قائم مقام صدر چوہدری لطیف اکبر وزرا سے حلف لیں گے، جبکہ پیپلز پارٹی کے سیکرٹری اطلاعات سردار جاوید ایوب نے بھی کابینہ کی تشکیل اور حلف برداری کی آج کی تاریخ کی تصدیق کر دی ہے۔

ابتدائی طور پر مشاورتی مراحل مکمل نہ ہونے کی وجہ سے حلف برداری گزشتہ روز موخر کر دی گئی تھی، اور پہلے صرف 10 وزرا شامل کرنے کی تجویز تھی، جسے اسمبلی اراکین نے مسترد کر دیا۔ گزشتہ دو روز سے مسلسل مشاورت کا عمل جاری رہا، جس کی قیادت پیپلز پارٹی کی رہنما فریال تالپور اور وزیراعظم فیصل ممتاز راٹھور کر رہے تھے۔ وزرا کی فہرست اور محکموں پر اتفاق رائے کے بعد آج حلف برداری کا فیصلہ کیا گیا ہے۔ حلف اٹھانے کے بعد وزیراعظم فیصل ممتاز راٹھور کابینہ کے ارکان کو محکمے الاٹ کریں گے۔