خیبر پختونخوا:سیکیورٹی فورسز کی کارروائیوں میں4 خوارج مارے گئے

راولپنڈی: خیبر پختونخوا میں سیکیورٹی فورسز کی کارروائیوں میں  انڈین پراکسی فتنہ الخوارج سے تعلق رکھنے والے 4 خوارج مارے گئے۔

آئی ایس پی آر کے مطابق خوارج کی موجودگی کی اطلاع پر سیکیورٹی فورسز نے ضلع باجوڑ میں انٹیلی جنس کی بنیاد پر آپریشن کیا۔ شدید فائرنگ کے تبادلے کے بعد ایک خارجی کو جہنم واصل کر دیا گیا۔

شمالی وزیرستان کے ضلع اسپن وام اور ذاکر خیل کے  علاقوں میں انٹیلی جنس پر مبنی آپریشنز میں مزید2 خوارج کو ہلاک کر دیا گیا۔ ضلع ڈیرہ اسماعیل خان میں ہونے والے ایک اور مقابلے میں ایک اور خارجی کو جہنم واصل کر دیا۔

آئی ایس پی آر کے مطابق  ہلاک ہونے والے خوارج سے اسلحہ اور گولہ بارود بھی برآمد ہوا، دہشت گرد حالیہ عرصے کے دوران ان علاقوں میں متعدد دہشت گرد سرگرمیوں میں ملوث تھے۔

آئی ایس پی آر نے کہا ہے کہ سیکیورٹی فورسز نے علاقے میں سینیٹائزیشن آپریشن بھی شروع کر دیا ہے تاکہ کسی بھی بھارتی سرپرست باقی دہشت گرد کے وجود کو مکمل طور پر ختم کیا جا سکے۔

آئی ایس پی آر کے مطابق وفاقی ایپکس کمیٹی کی منظوری سے جاری ویژن "عزمِ استحکام” کے تحت سیکیورٹی فورسز اور قانون نافذ کرنے والے اداروں کی انسدادِ دہشت گردی مہم پوری قوت کے ساتھ جاری رہے گی، ،ملک سے غیر ملکی پشت پناہی یافتہ دہشت گردی کا مکمل خاتمہ کیا جائے گا۔