راولپنڈی میں ٹریفک قوانین کی خلاف ورزی پر ای چالان سسٹم آج سے فعال

 

راولپنڈی میں ٹریفک قوانین کی خلاف ورزیوں کے لیے ای چالان سسٹم آج سے فعال ہوگیا ہے۔ وفاقی دارالحکومت کے جڑواں شہر میں سیف سٹی پروجیکٹ کے کیمروں کے ذریعے خودکار ای چالان کا باقاعدہ آغاز کیا گیا ہے۔

نئے سسٹم کے تحت ٹریفک قوانین کی خلاف ورزی پر تصاویر اور کوڈ کے ساتھ ای چالان گاڑی کے مالک کو موصول ہوگا اور مقررہ مدت میں جرمانہ جمع کرانا لازم ہوگا۔ ای چالاننگ سسٹم کو سیف سٹی کمانڈ اینڈ کنٹرول سینٹر سے منسلک کیا گیا ہے اور خلاف ورزی کی صورت میں خودکار سی سی ٹی وی کیمروں کے ذریعے فوری چالان جاری کیا جائے گا۔

ٹریفک سگنل کی خلاف ورزی، بغیر ہیلمٹ موٹر سائیکل چلانا، لین کی خلاف ورزی یا دوران ڈرائیونگ موبائل فون کے استعمال پر بھی فوری ای چالان جاری ہوگا۔ غیرنمونہ اور غیرقانونی نمبر پلیٹ پر بھی خودکار کارروائی عمل میں آئے گی اور چالان گھر کے پتے پر بھیج دیا جائے گا۔

راولپنڈی میں سیف سٹی کے تحت 359 مقامات پر 2000 سے زائد کیمرے نصب ہیں جبکہ داخلی و خارجی راستوں پر 15 کیمرے لگائے گئے ہیں۔ سیف سٹی کیمروں کے ذریعے عوامی مقامات کی مانیٹرنگ، ٹریفک مینجمنٹ، ٹریفک پولیس کی کارکردگی اور اہم سڑکوں کی نگرانی مؤثر انداز میں کی جا رہی ہے۔

حکام کے مطابق یہ سرویلنس سسٹم جرائم اور واقعات کی بروقت رپورٹنگ میں بھی مددگار ثابت ہو رہا ہے۔