ملک میں ہفتہ وار مہنگائی میں 0.07 فیصد اضافہ ریکارڈ

 

اسلام آباد: ملک میں ہفتہ وار مہنگائی میں 0.07 فیصد اضافہ ریکارڈ کیا گیا ہے، جس کے ساتھ مجموعی سالانہ شرح مہنگائی 3.53 فیصد تک پہنچ گئی۔

وفاقی ادارہ شماریات کی جاری کردہ ہفتہ وار رپورٹ کے مطابق حالیہ ہفتے میں 16 اشیائے ضروریہ کی قیمتیں بڑھیں، 13 اشیاء کی قیمتیں کم ہوئیں اور 22 اشیاء کی قیمتیں مستحکم رہیں۔

رپورٹ میں بتایا گیا ہے کہ ایک ہفتے کے دوران ٹماٹر کی قیمت میں 57.03 فیصد، لہسن میں 2.61 فیصد اور چینی میں 2.23 فیصد اضافہ ہوا۔ اسی دوران کیلے 0.72 فیصد اور چائے 0.59 فیصد مہنگی ہوئی۔ علاوہ ازیں ڈیزل، بیف، کوکنگ آئل، ایل پی جی اور جلانے والی لکڑی کی قیمتیں بھی بڑھی ہیں۔

دوسری جانب پیاز کی قیمت میں 12.38 فیصد اور چکن کی قیمت میں 8.07 فیصد کمی دیکھنے میں آئی۔ آلو، آٹا، انڈے، دال مونگ اور دال چنا کی قیمتیں بھی کم رہیں۔

وفاقی ادارہ شماریات کا کہنا ہے کہ مارکیٹ میں قیمتوں کے اتار چڑھاؤ کے باوجود اشیائے ضروریہ کی دستیابی یقینی بنانا حکومت کی ترجیحات میں شامل ہے۔