فیلڈ مارشل سے سعودی چیف آف جنرل اسٹاف کی ملاقات،عسکری تعاون مزید مضبوط بنانے پر اتفاق

راولپنڈی: فیلڈ مارشل سید عاصم منیر سے سعودی چیف آف جنرل اسٹاف   جنرل فیاض بن حمید الرویلی کی ملاقات ہوئی جس میں عسکری تعاون مزید مضبوط بنانے پر اتفاق کیا گیا۔ 

آئی ایس پی آر کے مطابق سعودی مسلح افواج کے چیف آف جنرل اسٹاف  جنرل فیاض بن حمید الرویلی جی ایچ کیو راولپنڈی پہنچے،جہاں انہوں نے فیلڈ مارشل سید عاصم منیر سے ملاقات کی ۔ملاقات میں دو طرفہ باہمی تعلقات اور دفاعی تعاون کے امور پر تبادلہ خیال کیا گیا۔

پاک سعودی عسکری تعاون کو مزید مضبوط بنانے پر زور دیا گیا،پاکستان اور سعودی عرب کے اسٹریٹیجک عسکری تعاون کو فروغ دینے پر توجہ مرکوز کی گئی ۔

معزز مہمان نے سعودی مسلح افواج کے ساتھ مختلف شعبوں میں پاکستان کے تعاون کو سراہا اور دوطرفہ مضبوط تعلقات کو مزید آگے بڑھانے کے عزم کا اظہار کیا۔

قبل ازیں پاک فوج کے چاق و چوبند دستے نے سعودی چیف آف جنرل اسٹاف کو گارڈ آف آنر پیش کیا،سعودی مسلح افواج کے چیف آف جنرل اسٹاف نے یادگار شہدا پر پھول بھی رکھے۔