ریلوے ملازمین نے ایمانداری کی مثال قائم کر دی

لاہور:ریلوے ملازمین نے ایمانداری اور فرض شناسی کی شاندار مثال قائم کر دی۔

تفصیلات کے مطابق پاکستان بزنس ایکسپریس کے ملازمین نے 22 نومبر 2025 کو مسافروں کے لیے ایمانداری اور پیشہ ورانہ ذمہ داری کی اعلیٰ مثال قائم کی۔ اس دوران ایک مسافر نے ٹکٹ خریدتے وقت 40 ہزار روپے زائد ادائیگی کر دی تھی، جس کا فوراً ریلوے عملے نے نوٹس لیا اور مسافر کو اضافی رقم واپس کر دی۔

مسافر کی جانب سے اس واقعے کی ویڈیو سوشل میڈیا پر بھی وائرل ہوئی، جس نے عملے کی دیانت اور فرض شناسی کی مثال کو عوام کے سامنے اجاگر کیا۔

وفاقی وزیر ریلوے، محمد حنیف عباسی نے اس شاندار کارکردگی پر عملے کی تعریف کی اور نقد انعام اور تعریفی سرٹیفیکیٹ دینے کی ہدایت کی۔ وزیر ریلوے نے کہا کہ یہ اہلکار پاکستان ریلویز کا فخر ہیں اور ان کی ذمہ داری، ایمانداری اور مسافروں کے لیے عزم دیگر عملے کے لیے قابل تقلید ہے۔

وزیر ریلوے کے اعلان کے مطابق آج CEO ریلویز، عامر علی بلوچ نے ٹرین مینیجر منصور اور ایس ٹی اعجاز کو نقد انعام اور تعریفی اسناد پیش کیں۔ اس موقع پر اہلکاروں کی فرض شناسی اور دیانت کو سراہا گیا اور کہا گیا کہ اس طرح کی خدمات ادارے کے معیار کو بلند کرنے اور عوامی اعتماد کو مستحکم کرنے میں مددگار ہیں۔