آفرلیٹرکے بغیربھی پاکستانیوں کا بیرون ملک جانا آسان

پاکستان کی وزارت برائے اوورسیز پاکستانیز نے ہنرمند اور پڑھے لکھے ورکرز کو آگاہ کیا ہے کہ وہ جرمنی کے اپرچونٹی کارڈ کے لیے درخواست دے سکتے ہیں۔اس کے تحت وہ آفرلیٹر کے بغیر بھی جرمنی جا کر ایک سال کے دوران کسی کمپنی میں باقاعدہ ملازمت حاصل کر کے مستقل رہائش اختیار کر سکتے ہیں۔

وزارت اوورسیز کے مطابق اپرچونٹی کارڈ کا مقصد غیر یورپی ملکوں سے آنے والے ہنرمند افراد کو جرمنی میں نوکری تلاش کرنے کے لیے داخلے کی سہولت دینا ہے۔عام ویزوں کے برعکس اس کے لیے پہلے سے نوکری کا لیٹر لازمی نہیں۔

اپرچونٹی کارڈ پر افراد جرمنی آکر قانونی طور پر رہتے ہوئے نوکری ڈھونڈ سکتے ہیں، ہفتے میں 20 گھنٹے تک پارٹ ٹائم کام کر سکتے ہیں اور مختصر مدت کی ٹرائل ملازمتیں بھی کر سکتے ہیں۔یہ نظام خاص طور پر اُن لوگوں کے لیے بنایا گیا ہے جن کے پاس اچھی قابلیت، تجربہ یا جرمن لیبر مارکیٹ میں کام کرنے کی مضبوط صلاحیت موجود ہو۔

موقع کارڈ پوائنٹس پر مبنی ایک سسٹم ہے جو امریکہ میں رائج ’گرین کارڈ‘ کی طرح ہے جس کی مدد سے خصوصی مہارتیں رکھنے والے پروفیشنلز کی امریکہ آمد کو یقینی بنایا جاتا ہے۔پوائنٹس سسٹم کا استعمال کرتے ہوئے اس بات کا تعین کیا جاسکتا ہے کہ آیا آپ اپنی اہلیت، تعلیم اور حالات کی بنا پر موقع کارڈ کے لیے اہل ہیں یا نہیں۔

موقع کارڈ حاصل کرنے کے لیے کم از کم چھ پوائنٹس کی ضرورت ہوتی ہے۔تاہم جرمنی میں تسلیم شدہ پیشہ ورانہ قابلیت سے پوائنٹس حاصل کیے بغیر ہنر مند کارکن کے طور پر درخواست دے سکتے ہیں۔
پوائنٹ سسٹم کے تحت موقع کارڈ حاصل کرنے کے لیے مندرجہ ذیل بنیادی شرائط پوری کرنا لازمی ہے۔
تعلیمی ڈگری مکمل ہو یا کسی ایسے ہنر میں کم از کم دو سال کی تربیت ہو جو جرمنی میں تسلیم شدہ ہو۔
جرمن زبان پر عبور ہونا چاہیے یا پھر انگریزی زبان پر کامن یورپی فریم ورک آف ریفرنس فار لینگوئجز (CEFR) کے تحت بی ٹو لیول کا عبور حاصل ہو۔اس کے علاوہ درخواست گزار کو یہ بھی ثابت کرنا ہوگا کہ ان کے پاس اتنے مالی وسائل ہیں کہ جب تک اُنھیں جرمنی میں ملازمت نہیں مل جاتی تب تک وہ اپنا خرچ اٹھا سکتے ہیں۔

پاکستان سے درخواست دینے کاعمل جرمن ایمبیسی کے آن لائن قونصلر سروسز پورٹل کے ذریعے آسان بنایا گیا ہے۔اپرچونٹی کارڈ کے لیے آپ کو اپنی تمام دستاویزات (ڈگری / پیشہ ورانہ سرٹیفکیٹ، زبان کا سرٹیفکیٹ، مالی ثبوت وغیرہ) اس پورٹل پر اپ لوڈ کرنا ہوں گی۔سب سے اہم ثبوت مالی وسائل ہیں۔ دکھانا ہوگا کہ آپ کے پاس کم از کم 13 ہزار سے زائد یورو موجود ہیں (یعنی تقریباً ایک ہزار بیس یورو فی مہینہ) جو بلاکڈ اکاؤنٹ، جرمنی میں کسی کی طرف سے رسمی ضمانت کے ذریعے ظاہر کیے جا سکتے ہیں۔ ہیلتھ انشورنس ہونا بھی ضروری ہے جو پورے سال کے لیے قابلِ قبول ہو۔

تعلیمی اہلیت کے لیے جرمن مشن کو ثبوت کی ضرورت ہوتی ہے۔ اسلام آباد میں جرمن ایمبیسی یا کراچی میں قونصل خانے کے ذریعے درخواست دے سکتے ہیںحال ہی میں اسلام آباد ایمبیسی نے ویزا پروسیسنگ کو اپ ڈیٹ کیا ہے۔ کئی ورک ویزا کیٹیگریز (بشمول اپرچونٹی کارڈ) اب ڈیجیٹل طریقے سے پروسیس کی جاتی ہیں ۔

اگر قیام کے دوران مناسب ملازمت مل جائے یا اہلیت تسلیم ہو جائے تو پھر دیگر رہائشی ویزے (مثلاً ورک پرمٹ یا بلیو کارڈ) کے لیے مقامی امیگریشن آفس کے ذریعے درخواست دے سکتے ہیں۔

وزارت کا کہنا ہے کہ پاکستانی ہنرمند پیشہ ور افراد کے لیے اپرچونٹی کارڈ جرمنی میں بغیر ملازمت کی پیشکش کے داخل ہونے کا جائز اور منظم طریقہ فراہم کرتا ہے ۔جزوقتی کام کرنے کی سہولت کی وجہ سے آپ اپنے اخراجات پورے کر سکتے ہیں اور مالی مشکلات کا خطرہ کم ہوتا ہے۔

پوائنٹ سسٹم کیا ہے؟
اگر آپ اپنی حاصل کردہ تعلیمی قابلیت کو جرمنی کے معیار کے مطابق ثابت کرسکتے ہیں تو آپ چار پوائنٹس حاصل کرنے کے اہل ہوں گے۔
اگر آپ کسی ایسے پیشے میں قابلیت رکھتے ہیں جس کے ہنرمندوں کی جرمنی میں قلت ہے تو آپ کو اس کا ایک پوائنٹ ملے گا۔
اگر آپ نے پچھلے پانچ سال میں اپنی قابلیت کے مطابق کم از کم دو سال کا پیشہ ورانہ تجربہ حاصل کیا ہے تو آپ دو پوائنٹس حاصل کرنے کے اہل ہوں گے۔ اور اگر آپ کے پاس پچھلے سات سال میں کم از کم تین سال کا پیشہ ورانہ تجربہ ہے تو آپ کو تین پوائنٹس ملیں گے۔
اگر آپ کو جرمن زبان پر کامن یورپی فریم ورک آف ریفرنس فار لینگوئجز (CEFR) کے لیول A2 کی مہارت حاصل ہے تو اس کے لیے ایک پوائنٹ، B1 لیول کے لیے دو پوائنٹس اور B2 یا اس سے اوپر کے لیول کے لیے تین پوائنٹس ملیں گے۔
اس کے علاوہ ایک اضافی پوائنٹ بھی مل سکتا ہے اگر آپ کو انگریزی زبان پر C1 یا اس سے اوپر کی سطح کی مہارت حاصل ہے۔
اگر آپ کی عمر 35 سال سے کم ہے تو آپ کو دو پوائنٹ ملتے ہیں ، 35 سے 40 سال کی عمر کے افراد کو ایک پوائنٹ ملتا ہے۔
اگر آپ پچھلے پانچ سال میں کم از کم چھ ماہ جرمنی میں قانونی طور پر مقیم رہے ہیں تو تو اس کا ایک پوائنٹ ملے گا۔ اس میں تعلیم، زبان کے حصول یا فائدہ مند روزگار کے لیے قیام شامل ہے۔ سیاحتی اور تفریحی مقاصد کے لیے کیا گیا دورہ اس میں شامل نہیں
اگر آپ اپنے شریک حیات کے ساتھ مل کر موقع کارڈ کے لیے درخواست دیتے ہیں، تو آپ دونوں میں سے ایک کو ایک اضافی پوائنٹ حاصل ہوسکتا ہے بشرطیکہ آپ دیگر تمام شرائط پر پورا اترتے ہوں۔