چیئرمین پی سی بی محسن نقوی کی سعودی وزیر کھیل سے اہم ملاقات

 ریاض: چیئرمین پاکستان کرکٹ بورڈ (پی سی بی) محسن نقوی نے سعودی عرب کے وزیر کھیل شہزادہ عبدالعزیز بن ترکی الفیصل سے اہم ملاقات کی، جس میں دونوں ممالک کے درمیان کھیلوں خصوصاً کرکٹ کے شعبے میں تعاون کو مزید مضبوط بنانے پر تفصیلی تبادلہ خیال کیا گیا۔

محسن نقوی نے کہا کہ سعودی قیادت کی سرپرستی میں مملکت نے بڑے بین الاقوامی ٹورنامنٹس کی میزبانی حاصل کر کے کھیلوں کی دنیا میں ایک نئی تاریخ رقم کی ہے۔ انہوں نے سعودی وزیر کھیل کو ای ایف سی ایشین کپ 2027، ایشین ونٹر گیمز 2029، ایشین گیمز 2034 اور فیفا ورلڈ کپ 2034 کی میزبانی کے حصول پر مبارکباد بھی دی۔

ملاقات میں دونوں رہنماؤں نے سعودی عرب میں کرکٹ انفراسٹرکچر کی ترقی، مشترکہ ٹریننگ پروگرامز، باہمی دوروں اور جونیئر و یوتھ لیول ٹورنامنٹس کے ذریعے نوجوانوں کے لیے نئے مواقع پیدا کرنے پر بھی بات کی۔

وفاقی وزیر داخلہ اور انسداد منشیات نے کہا کہ پاکستان اور سعودی عرب کھیلوں خصوصاً کرکٹ کو دوستی اور علاقائی ہم آہنگی کا مضبوط پل بنائیں گے۔ ملاقات میں اس بات پر اتفاق ہوا کہ دونوں ممالک کے متعلقہ ادارے رابطوں کو مزید تیز کریں گے اور عملی منصوبہ بندی کے ذریعے مشترکہ اقدامات کو جلد حتمی شکل دی جائے گی تاکہ نوجوانوں کو زیادہ سے زیادہ مثبت مواقع فراہم کیے جا سکیں۔