وزیراعظم شہباز شریف دو روزہ سرکاری دورے پر بحرین روانہ

اسلام آباد: وزیراعظم شہباز شریف دو روزہ سرکاری دورے پر بحرین روانہ ہو گئے ہیں۔ دفتر خارجہ کے ترجمان کے مطابق وزیراعظم کے ہمراہ ایک اعلیٰ سطح کا وفد بھی بحرین جا رہا ہے، جس میں نائب وزیراعظم و وزیر خارجہ اسحاق ڈار، وفاقی وزرا اور دیگر حکام شامل ہیں۔

دورے کے دوران وزیراعظم شہباز شریف بحرین کے بادشاہ حمد بن عیسیٰ الخلیفہ، ولی عہد و وزیراعظم شہزادہ سلمان بن حمد الخلیفہ اور نائب وزیراعظم شیخ خالد بن عبداللہ الخلیفہ کے ساتھ اعلیٰ سطحی ملاقاتیں کریں گے۔

دفتر خارجہ کے مطابق یہ سرکاری دورہ پاکستان اور بحرین کے دیرینہ خوشگوار تعلقات کی عکاسی کرتا ہے۔ دورے کا مقصد دونوں ممالک کے درمیان نتائج پر مبنی اور تزویراتی شراکت داری کو فروغ دینا ہے۔ اس موقع پر گرمجوشی اور خوشگوار تعلقات کو تقویت ملے گی، شراکت داری کی نئی راہیں متعین ہوں گی اور عوام سے عوام کے روابط کو بھی گہرا کیا جائے گا، جو باہمی فائدے اور تعاون میں مددگار ثابت ہوں گے۔