پشاور میں گیس پائپ لائن پھٹنے کے بعد شدید آگ بھڑک اٹھی،کئی شہروں کو سپلائی متاثر

پشاو میں گیس پائپ لائن دھماکے سے پھٹ گئی، 24انچ پائپ لائن میں آگ لگ گئی۔

 

جنرل منیجر سوئی ناردرن گیس وقاص شنواری نے بتایا کہ پشاور میں حسن خیل میں گیس پائپ لائن میں دھماکا ہوا ہے۔ یہ دھماکا کرک سے نوشہرہ گیس پائپ لائن میں ہوا۔

انہوں نے بتایا کہ دھماکے کی وجہ سے پشاور،چارسدہ ،نوشہرہ،مردان،سوات کے صارفین کو گیس کی سپلائی متاثر ہوگی۔گیس کی سپلائی بند کرنے کے لیے ٹیمیں علاقے میں بھیج دی گئی ہیں۔

 

وقاص شنواری کے مطابق دھماکے کی نوعیت کا ابھی پتا نہیں چل سکا، جائے وقوعہ کا جائزہ لیا جائے گا۔

 

دوسری جانب پشاورکے سی سی پی او ڈاکٹر میاں سعید کا کہنا ہے کہ دھماکے کی نوعیت معلوم کی جا رہی ہے ، لوگوں کو آگ سے دور رہنے کی ہدایت جاری کی گئی ہے ، سوئی گیس حکام کو گیس کی سپلائی بند کرنے کا کہہ دیا ہے۔

 

پولیس ذرائع کے مطابق گیس پائپ لائن دھماکے میں دہشت گردی کے عنصر کا بھی جائزہ لیا جا رہا ہے ۔

ترجمان سوئی ناردرن کا کہنا ہے کہ پائپ لائن کےمتاثرہ حصے کو الگ کر دیا گیا، پشاور، ایبٹ آباد، مردان کی  سپلائی متبادل راستوں سے جاری ہے، کچھ علاقوں میں گیس پریشر کم رہنے کا امکان ہے۔

ترجمان کا مزید کہنا ہے کہ آگ پر قابو پاتے ہی مرمتی کام شروع کیا جائے گا۔