عمران خان سے متعلق بھارتی میڈیا جھوٹی خبریں پھیلا رہا ہے،گنڈا پور

سابق وزیراعلیٰ خیبرپختونخوا علی امین گنڈا پور نے ڈیرہ اسماعیل خان میں میڈیا سے گفتگو کرتے ہوئے کہا کہ بھارتی میڈیا کی جانب سے عمران خان سے متعلق جھوٹی خبریں پھیلانا سنگین پروپیگنڈا ہے۔ ان کا کہنا تھا کہ منفی مہم کا مقصد عوام میں اشتعال پیدا کرنا اور نفرت پھیلانا ہے، اور یہ پروپیگنڈا ملک کو عدم استحکام کی طرف دھکیلنے کی کھلی سازش ہے۔

🚨عمران خان بلکل ٹھیک ہیں. بشری بی بی بھی ٹھیک ہے۔۔ مگر ان کی ملاقات نہ کروانا غلط ہے۔۔ انڈیا پراپگنڈہ کر رہے۔۔ وہ شکست کی وجہ سے عمران خان کے بارے میں بکواس کر رہے۔۔ علی امین گنڈا پور۔ pic.twitter.com/cpwIIIhNzI

— Mehwish Qamas Khan (@MehwishQamas) November 27, 2025

گنڈا پور نے کہا کہ عمران خان اور بشریٰ بی بی مکمل طور پر صحت مند ہیں اور ایسی تمام خبریں بے بنیاد ہیں۔ انہوں نے عمران خان کے خلاف قائم جھوٹے مقدمات اور انسانی حقوق کی پامالیوں کی شدید مذمت کی اور کہا کہ ان کے خلاف ناانصافیوں کو ہر فورم پر اٹھایا گیا ہے۔

انہوں نے مزید کہا کہ عمران خان نہ صرف پاکستان بلکہ عالمی سطح پر ایک معروف اور معتبر لیڈر ہیں، اور قوم اپنے قائد کے ساتھ کھڑی ہے۔ علی امین گنڈا پور نے زور دیا کہ جھوٹے پروپیگنڈے کو ناکام بنانے اور عمران خان کی جلد رہائی کے لیے جدوجہد پوری قوت کے ساتھ جاری رہے گی۔