پاکستان افغانستان کے اندر آپریشن کرنے والا تھا، قطر نے روکا، اسحاق ڈار

نائب وزیراعظم اور وزیر خارجہ اسحاق ڈار نے انکشاف کیا ہے کہ پاکستان افغانستان کے اندر آپریشن کرنے والا تھا لیکن عین وقت پر قطر نے روکا اور ثالثی کی پیشکش کی جس کے بعد کارروائی نہیں کی گئی تاہم ثالثی کے نتائج نہ نکلنے پر اب قطر خود اپ سیٹ ہے۔

اسلام آباد میں میڈیا کے نمائندوں کو بریف کرتے ہوئے اسحاق ڈار نے کہا کہ افغان طالبان کو حکومت میں ہونے کے باعث اپنی پالیسی میں نظر ثانی کرنا ہو گی۔ ہمیں ان سے کچھ نہیں چاہیے ہم ہر چیز کرنے کے لیے تیار ہیں لیکن جب سے ان کی حکومت آئی ہے ہمارے چار ہزار آفیسرز اور جوانوں کی میتیں اٹھ چکی ہیں، 20 ہزار سے زیادہ زخمی ہو چکے ہیں تو میں کس منہ سے میں کہوں کہ ہم آنکھیں بند رکھیں۔

اسحاق ڈار کا کہنا تھا قطر کی وزارت خارجہ کو پتا چل گیا تھا کہ ہم ایکشن کرنے کی جانب جا رہے ہیں، پھر قطر نے مسئلے کے حل اور ثالثی کی درخواست دی جس کے بعد اس رات جو آپریشن ہونے جا رہا تھا وہ روکا گیا۔

اسحاق ڈار کا کہنا تھا کہ دہشت گردی کے واقعات میں کمی نہیں ہو رہی بلکہ یہ بڑھتے جا رہے ہیں۔ یہ ان کی خام خیالی ہے کہ ہم اس کو حل نہیں کر سکتے۔ اللہ نے پاکستان کو قوت دی ہے ہم اس پر کارروائی کر سکتے ہیں اور چیزوں کو بالکل ٹھیک کر سکتے ہیں لیکن یہ بھی ٹھیک نہیں کہ ہم اپنے بھائی کے گھر جا کر ان کو گھس کر ماریں۔

اسحاق ڈار نے بتایا کہ ’قطر ایسا ملک ہے جس کا وزارت خارجہ ہر گھنٹہ ہم سے رابطے میں تھا اور ان کو پتا چل گیا تھا کہ ہم ایکشن کرنے کی جانب جا رہے ہیں پھر قطر کا میسیج آیا جس کے بعد اس رات جو آپریشن ہونے جا رہا تھا وہ روکا گیا لیکن پھر اس ثالثی سے کچھ نہ نکل سکا۔‘

ان کا کہنا تھا کہ ’مناسب نہیں کہ کسی دوست ملک کے لیے کہا جائے لیکن وہ (قطر)اب خود اپ سیٹ ہیں کہ انھوں نے ثالثی کروائی اور نتیجہ نہ نکل سکا۔مجھے ایران کے وزیر خارجہ نے چند روز قبل فون کیا کہ اگر آپ چاہیں تو افغانستان، قطر، ترکی ایران سمیت کچھ ممالک بات کرنے کے لیے بیٹھ جائیں۔‘

اسحاق ڈار نے کہا کہ وہ وقت دور نہیں جب دہشت گردی کو ختم کرنے کے لیے مسلمان اور غیر مسلم ممالک اکھٹے ہو کر کام کریں گے تو کیا بہتر نہیں کہ ہم اپنے خطے کو پر امن کر لیں۔

انہوں نے کہا کہ افغانستان سے کہا کہ امن ہی واحد راستہ ہے،امیر متقی نے کہا کہ ہم نے ٹی ٹی پی کے کئی لوگوں کو جیل بھیج دیا۔افغانستان سے کہا اپنی سرزمین ہمارے خلاف استعمال نہ ہونے دیں۔پاکستان نے واحد مطالبہ کیا لیکن افغانستان کی جانب سے کوئی پیشرفت سامنے نظر نہیں آئی۔ ان کا کہنا تھا کہ پاکستان نے افغانستان کے ساتھ جو وعدے کیے وہ پورے کیے۔پاکستان نے خطے میں روابط بڑھانے کیلئے کوششیں کیں۔