27ویں آئینی ترمیم پر یو این ہائی کمشنر برائے انسانی حقوق کا بیان مسترد

 

اسلام آباد — پاکستان نے 27 ویں آئینی ترمیم سے متعلق اقوام متحدہ کے ہائی کمشنر برائے انسانی حقوق کے بیان کو مسترد کر دیا ہے۔

دفتر خارجہ نے کہا کہ پاکستان کی پارلیمنٹ کی منظور کردہ 27 ویں آئینی ترمیم پر اقوام متحدہ کی بے جا تشویش ناقابل فہم ہے۔ بیان میں کہا گیا کہ آئینی ترامیم عوام کے منتخب نمائندوں کا مکمل اختیار ہیں اور جمہوری طریقہ کار کا احترام ہونا چاہیے۔ پاکستان انسانی حقوق، انسانی وقار، بنیادی آزادیوں اور قانون کی حکمرانی کے تحفظ کے عزم پر قائم ہے۔

دفتر خارجہ نے افسوس کا اظہار کرتے ہوئے کہا کہ پاکستان کا موقف اور زمینی حقائق اقوام متحدہ کے بیان میں شامل نہیں کیے گئے۔ انہوں نے کہا کہ یو این ہائی کمشنر خودمختار فیصلوں کا احترام کریں اور سیاسی تعصب یا غلط معلومات پر مبنی تبصروں سے گریز کریں۔

واضح رہے کہ اقوام متحدہ کے انسانی حقوق کے کمشنر نے اپنے بیان میں کہا تھا کہ پاکستان میں جلد بازی میں منظور کی گئی آئینی ترمیم عدلیہ کی آزادی کو کمزور کرتی ہے۔

ان کا یہ بھی کہنا تھا کہ گزشتہ سال منظور کی گئی 26 ویں آئینی ترمیم کی طرح، یہ ترمیم بھی وکلا برادری اور سول سوسائٹی سے بڑے پیمانے پر مشاورت اور بحث کے بغیر کی گئی۔