کراچی: بیٹی کے اسکول بیگ میں منشیات اسمگل کرنیوالی خاتون گرفتار

کراچی: بیٹی کے اسکول بیگ میں کتابوں کے نیچے  چھپا کر منشیات کوئٹہ سے کراچی اسمگل کرنے والی خاتون کو گرفتار کرلیا گیا ہے۔

نجی ٹی وی کے مطابق موچکو پولیس نے کوئٹہ سے کراچی آنے والی مسافر بس کی تلاشی کے دوران شک کی بنیاد پر 10سالہ بچی کے پاس موجود اسکول بیگ کی تلاشی لی جس  دوران اسکول بیگ سے مبینہ طور پر 4کلو منشیات برآمد کرلی گئی۔

ایس ایس پی کیماڑی امجد شیخ کے مطابق مسافر کوچ میں منشیات سپلائی میں ملوث خاتون بی بی ذاکرہ کوئٹہ سے کراچی آنے والی بس میں اپنی 10سالہ بیٹی کے ساتھ سفر کررہی تھی۔

ایس ایس پی کیماڑی نے بتایا کہ ملزمہ نے  اپنی بیٹی کے اسکول بیگ میں کتابوں کے نیچے منشیات چھپاکر کراچی منتقل کرنے کی کوشش کی جسے کیماڑی پولیس نے ناکام بنادیا۔ ملزمہ کو تھانے منتقل کرکے اس کے خلاف منشیات ایکٹ کے تحت مقدمہ درج کرلیا گیا ہے۔