شوکت خانم ہسپتال اور نمل یونیورسٹی کے بینک اکاؤنٹ بحال کرنے کا حکم

راولپنڈی: انسداد دہشت گردی عدالت نے شوکت خانم ہسپتال اور نمل یونیورسٹی کے بینک اکاؤنٹس ڈی فریز کرنے کا حکم دے دیا۔

راولپنڈی کی انسدادِ دہشت گردی عدالت میں علیمہ خان کے خلاف 26 نومبر کے احتجاج پر درج مقدمے کی سماعت ہوئی، کیس کی سماعت انسداد دہشت گردی عدالت کے جج امجد علی شاہ نے کی۔

سماعت کے دوران شوکت خانم ہسپتال کے وکلا عدالت پیش ہوئے، سرکاری پراسیکیوٹر ظہیر شاہ کا کہنا تھا کہ شوکت خانم کے اکاؤنٹس فریزکرنے سے متعلق کوئی تحریری درخواست دائر نہیں کی گئی تھی۔

انہوں نے کہا ہے کہ علیمہ خان کے ذاتی اکاؤنٹس فریز کرنے کے لیے ان کا شناختی کارڈ نمبر اسٹیٹ بینک کو بھجوایا گیا تھا جس کے بعد اسٹیٹ بینک نے ان کے سی این آئی سی پر رجسٹرڈ تمام اکاؤنٹس بند کر دیے۔

پراسیکیوشن کی جانب سے شوکت خانم اور نمل یونیورسٹی کے اکاؤنٹس ڈی فریز کرنے پر کوئی اعتراض نہیں اٹھایا گیا تاہم دلائل سننے کے بعد عدالت نے دونوں اداروں کے اکاؤنٹس بحال کرنے کا حکم دے دیا۔