کراچی،مشتعل شہریوں نے ڈاکو کو زندہ جلا ڈالا

کراچی کے علاقے اورنگی ٹاؤن میں مشتعل شہریوں نے ایک مبینہ ڈاکو کو پکڑ کر کھمبے سے باندھ دیا اور آگ لگا دی، جس کے نتیجے میں وہ ہلاک ہو گیا۔

پولیس کے مطابق واقعہ اس وقت پیش آیا جب مبینہ ڈاکو نے سیکٹر 7-اے میں شہری عبدالحسن کو فائرنگ کر کے قتل کر دیا۔ واقعے کے بعد علاقے میں شدید غم و غصہ پھیل گیا اور شہریوں نےمشتعل ہو کر ڈاکو کو پکڑ کر تشدد کا نشانہ بنایا۔

عینی شاہدین کے مطابق ڈاکو نے شعلوں میں گھرنے کے بعد خود کو بچانے کی کوشش کی، تاہم آگ کی شدت بڑھنے کے باعث وہ بچ نہ سکا۔ پولیس اور ریسکیو اہلکار موقع پر پہنچے، آگ پر قابو پایا اور شدید جھلس جانے کی حالت میں ڈاکو کو اسپتال منتقل کیا گیا، جہاں وہ زخموں کی تاب نہ لاتے ہوئے دم توڑ گیا۔

ریسکیو حکام کے مطابق ہلاک ہونے والے کا نام ساجد ولد زرین داد، ڈی سلویہ ٹاؤن کا رہائشی تھا۔ پولیس نے موقع سے شواہد جمع کر لیے ہیں اور ذمہ دار افراد کی نشاندہی کے لیے تحقیقات شروع کر دی ہیں۔ حکام کا کہنا ہے کہ جرائم قابلِ مذمت ہیں، لیکن قانون ہاتھ میں لینے سے مزید سنگین نتائج پیدا ہو سکتے ہیں۔