اسلام آباد:پارلیمنٹ کا چوتھا مشترکہ اجلاس تاخیر کے بعد شروع

صدر مملکت کی جانب سے نو ماہ بعد طلب کیے گئے پارلیمنٹ کے چوتھے مشترکہ اجلاس کی کارروائی گھنٹے بھر کی تاخیر سے شروع ہوئی، اجلاس کے آغاز پر اپوزیشن کی جانب سے نعرے بازی بھی دیکھی گئی۔

اجلاس سپیکر قومی اسمبلی سردار ایاز صادق کی زیر صدارت ہو رہا ہے، جس میں اہم قوانین کی منظوری متوقع ہے۔ اجلاس کے دوران قومی کمیشن برائے حقوق اقلیتاں بل 2025، قومی اسمبلی سیکرٹریٹ ملازمین ترمیمی بل 2025، حیاتیاتی و زہریلے ہتھیاروں کی روک تھام بل 2024، پاکستان انسٹیٹیوٹ آف مینجمنٹ، سائنسز اینڈ ٹیکنالوجی بل 2023، نیشنل یونیورسٹی برائے سیکیورٹی سائنسز اسلام آباد بل 2023، اخوت انسٹیٹیوٹ قصور بل 2023 اور گھرکی انسٹیٹیوٹ آف سائنس اینڈ ٹیکنالوجی بل 2025 کی منظوری متوقع ہے۔

ذرائع کے مطابق اجلاس میں صحافیوں اور میڈیا ورکز کے تحفظ کا بل، اقلیتوں کے حقوق کمیشن کا بل اور پاکستان اینیمل کونسل کا بل بھی پیش کیے جانے کے امکانات ہیں۔ پیپلز پارٹی کے چیئرمین بلاول بھٹو زرداری اور جمعیت علمائے اسلام کے سربراہ مولانا فضل الرحمن بھی اجلاس میں خطاب کریں گے۔

یہ اجلاس موجودہ سیاسی حالات میں اہم قرار دیا جا رہا ہے اور اس کے فیصلے قومی سطح پر اہم اثرات مرتب کر سکتے ہیں۔