9 مئی حملہ کیس،پی ٹی آئی کے 18 غیرحاضر ملزمان اشتہاری قرار

انسدادِ دہشتگردی عدالت راولپنڈی نے 9 مئی جی ایچ کیو حملہ کیس میں پی ٹی آئی کے 18 غیر حاضر ملزمان کو اشتہاری قرار دے دیا ہے۔

اشتہاری قرار دیے گئے ملزمان میں شبلی فراز، عمر ایوب، کنول شوذب، شیخ راشد شفیق اور زرتاج گل شامل ہیں۔ دیگر ملزمان میں مہر جاوید، محمد احمد چٹھہ، رائے حسن نواز، بلال اعجاز اور مرتضیٰ خان بھی شامل ہیں۔ اشرف سوہنا، چوہدری آصف، شکیل نیازی اور محمد انصر اقبال کو بھی اشتہاری قرار دیا گیا ہے۔

اسی فہرست میں حیدر محمود، شاہیر سکندر اور حمزہ لطیف کے نام بھی شامل ہیں۔

عدالت نے تمام ملزمان کی غیر منقولہ جائیداد ضبط کرنے کے احکامات جاری کر دیے ہیں۔ اس سلسلے میں ملزمان کے متعلقہ اضلاع کے ریونیو افسران کو جائیداد قرق کرنے کی ہدایات بھی جاری کی گئی ہیں۔

عدالتی حکم کے مطابق اگر ملزمان مقررہ تاریخ کے اندر عدالت کے سامنے سرنڈر نہیں کرتے تو ان کی جائیداد نیلام کر دی جائے گی۔ عدالت نے ملزمان کے ضامنوں کو بھی نوٹسز جاری کر دیے ہیں۔