ٹرانسپورٹرز کی صوبہ بھر میں پہیہ جام ہڑتال کا اعلان

 

لاہور: پاکستان گڈز ٹرانسپورٹ ایسوسی ایشن نے اعلان کیا ہے کہ 8 دسمبر سے صوبہ بھر میں پہیہ جام ہڑتال ہوگی۔ صدر نبیل طارق نے پریس کانفرنس میں کہا کہ حکومت کو مطالبات منظور کرنے کے لیے چار روز کا وقت دیا جا رہا ہے، بصورت دیگر ٹرانسپورٹرز سڑکوں پر نکلیں گے۔

نبیل طارق نے کہا کہ ٹریفک آرڈیننس 2025 پر مشاورت کے بغیر عملدرآمد کیا گیا، ڈرائیورز کی تذلیل ہو رہی ہے اور بھاری جرمانوں کی وجہ سے کاروبار رک چکا ہے۔ ان کے مطابق سامان گوداموں میں پڑا ہے اور ڈرائیورز سامان لے جانے سے گریزاں ہیں۔

صدر ایسوسی ایشن نے مطالبات میں شامل کیا کہ ناجائز جرمانے بند کیے جائیں، پاسنگ کی سہولت تمام سرکاری اڈوں پر فراہم کی جائے، نئے ٹرک سٹینڈز کے لیے جگہ فراہم کی جائے، منسوخ شدہ مزدور بحال کیے جائیں، روٹ پرمٹ کی مدت تین سال کی جائے اور موٹر وے پر ٹارگٹ چالان اور بڑھتی ڈکیتیاں روکی جائیں۔

انہوں نے مزید کہا کہ ہائی ویز اور جی ٹی روڈ پر غیر ضروری ٹول پلازے اور کسٹم کی ناجائز چیکنگ ختم کی جائے، ایکسل لوڈ کا نظام پورے ملک میں یکساں کیا جائے۔

عصمت اللہ نیازی، صدر آل پاکستان پبلک ٹرانسپورٹ اونرز ایسوسی ایشن، نے کہا کہ ہڑتال مطالبات منظور ہونے تک جاری رہے گی اور ضرورت پڑنے پر پورے ملک میں ٹرانسپورٹ بند کیا جا سکتا ہے۔