حکومت نے ایکشن پلان تیار کرنے کیلئے 31 دسمبر کی ڈیڈ لائن دیدی

اسلام آباد: حکومت نے آئی ایم ایف کی گورننس اینڈ کرپشن ڈائیگناسٹک رپورٹ (GCD) کو ایک چارج شیٹ قرار دیتے ہوئے 31 دسمبر تک کرپشن کے تدارک کے لیے جامع ایکشن پلان تیار کرنے کا اعلان کیا ہے۔

بدھ کو پارلیمنٹ ہاؤس میں سینیٹ اور قومی اسمبلی کی قائمہ کمیٹی برائے خزانہ کے اجلاس ہوئے، جن میں آئی ایم ایف کی رپورٹ کا تفصیلی جائزہ لیا گیا۔ وزیرِ خزانہ محمد اورنگزیب نے قومی اسمبلی کی قائمہ کمیٹی کو گورننس، ٹیکسیشن، کرپشن، ریگولیٹری امور اور قانون کی بالادستی سمیت مختلف شعبوں سے متعلق 15 اہم سفارشات سے آگاہ کیا۔

وزیرِ خزانہ نے بتایا کہ حکومت 31 دسمبر 2025 تک ان 15 سفارشات پر عملدرآمد کے لیے مختصر، درمیانے اور طویل المدتی (6 ماہ، 18 ماہ اور 36 ماہ) ایکشن پلان تیار کرے گی۔ انہوں نے مزید کہا کہ سرکاری افسروں کے اثاثے بھی اگلے سال تک آن لائن کیے جائیں گے تاکہ شفافیت کو فروغ دیا جا سکے۔

حکومت کا کہنا ہے کہ یہ اقدام بدعنوانی کے خاتمے اور شفاف حکومتی نظام کے قیام میں مددگار ثابت ہوگا۔