فن لینڈ کے 108 ویں یوم آزادی پرصدر زرداری کی مبارکباد

 

اسلام آباد: صدر مملکت آصف علی زرداری نے فن لینڈ کے 108 ویں یوم آزادی پر مبارکباد پیش کی اور فن لینڈ کے عوام کے لیے نیک خواہشات کا اظہار کیا۔

صدر زرداری نے کہا کہ پاکستان فن لینڈ کے ساتھ دوطرفہ تعلقات کو انتہائی اہمیت دیتا ہے اور دونوں ممالک جمہوری قدروں اور تکثیریت میں ہم خیال ہیں۔ انہوں نے مزید کہا کہ فن لینڈ تعلیم، جدت اور تحقیق میں نمایاں مقام رکھتا ہے اور مسلسل آٹھ برس گلوبل ہیپی نیس انڈیکس میں پہلی پوزیشن حاصل کر کے اپنے عوام کی تخلیقی صلاحیت اور ثابت قدمی کا مظاہرہ کر رہا ہے۔

صدر زرداری نے کہا کہ پاکستان اور فن لینڈ کے درمیان تعاون کو مزید بڑھانے کے لیے پرعزم ہیں، اور دونوں ممالک عالمی امور میں قریبی ہم آہنگی رکھتے ہیں۔ انہوں نے تجارت، تعلیم، گرین ٹرانزیشن، ڈیجیٹلائزیشن، مائننگ اور ٹیلی کام میں مشترکہ کام کے وسیع امکانات پر بھی زور دیا۔