اسلام آباد:سموگ میں اضافہ،بچوں،بزرگوں اور دائمی مریضوں کیلئے ایڈوائزری جاری

 

فاقی دارالحکومت میں سموگ اور فضائی آلودگی میں مسلسل اضافے کے باعث سانس، دل اور آنکھوں کے امراض بڑھنے کے خدشے پر ضلعی محکمہ صحت نے حفاظتی ایڈوائزری جاری کر دی ہے۔ ڈی ایچ او کی جانب سے جاری کردہ ایڈوائزری میں خاص طور پر بچوں، بزرگوں اور دائمی بیماریوں میں مبتلا افراد کو اضافی احتیاط کی ہدایت کی گئی ہے۔

ایڈوائزری کے مطابق شہری غیر ضروری طور پر گھر سے باہر نکلنے سے گریز کریں اور بیرونی سرگرمیوں کو محدود رکھیں۔ سموگ کے دوران کھڑکیاں اور دروازے بند رکھنے، دھوئیں سے بچاؤ اور ماسک کے استعمال پر زور دیا گیا ہے تاکہ آلودہ ہوا سے بچا جا سکے۔

محکمہ صحت نے مشورہ دیا ہے کہ آنکھوں میں جلن محسوس ہونے پر انہیں صاف پانی سے دھویا جائے جبکہ سانس میں دشواری یا دیگر شدید علامات کی صورت میں فوری طبی امداد حاصل کی جائے۔ شہریوں سے اپیل کی گئی ہے کہ سموگ کے اوقات میں ٹریفک اور غیر ضروری گاڑیوں کے استعمال میں کمی کریں تاکہ فضائی آلودگی میں کمی لائی جا سکے۔