بھارتی خفیہ ایجنسی را کے 12 دہشت گرد گرفتار،بھاری اسلحہ و بارود برآمد

 

سی ٹی ڈی پنجاب نے کارروائی کے دوران بھارتی خفیہ ایجنسی را کے 12 دہشت گردوں کو گرفتار کر لیا، جن کے قبضے سے بھاری مقدار میں اسلحہ، بارودی مواد، ڈیٹونیٹر، آئی ای ڈی بم اور نقدی برآمد ہوئی۔

حکام کے مطابق گرفتار دہشت گردوں کے قبضے سے حساس مقامات اور اداروں کی تصاویر، ویڈیوز اور لوکیشن بھی برآمد کی گئی ہیں۔ فیصل آباد سے گرفتار دہشت گرد پنجاب میں خوف و ہراس پھیلانے کے ساتھ مذہبی منافرت پھیلانا چاہتے تھے۔

لاہور سے گرفتار دہشت گردوں میں دیپ سنگھ، عظمت، فیضان، نبیل، ابرار، عثمان اور سرفراز شامل ہیں جبکہ فیصل آباد سے دانش اور بہاولپور سے فتنہ الہندوستان کے رجب، ہاشم، ثاقب اور عارف کو گرفتار کیا گیا۔

سی ٹی ڈی کے مطابق "عادل” نامی فیس بک آئی ڈی، جو بھارت میں را کی آپریشنل سرگرمیوں سے وابستہ تھی، کی مدد سے دہشت گردوں کو پکڑا گیا۔ گرفتار دہشت گردوں کو بھارتی خفیہ ایجنسی را کی جانب سے بھاری فنڈنگ بھی فراہم کی جا رہی تھی۔

گرفتار دہشت گردوں کے قبضے سے 7 آئی ای ڈی بم، 2 ڈیٹونیٹر، 102 فٹ حفاظتی فیوز وائر، موبائل فون، نقدی اور مختلف قسم کے اسلحہ برآمد ہوئے ہیں۔ فتنہ الہندوستان کے دہشت گردوں کے خلاف مقدمات درج کر کے مزید تفتیش جاری ہے۔