بدعنوانی کے خاتمے کیلئے اقدامات مزید مؤثر بنائیں گے،وزیراعظم

 

اسلام آباد: وزیراعظم شہباز شریف نے انسداد بدعنوانی کے عالمی دن کے موقع پر کہا ہے کہ پاکستان بدعنوانی کے خاتمے کے لیے جاری اقدامات کو مزید مؤثر بنائے گا اور اس عزم کی تجدید کرتا ہے۔

وزیراعظم نے کہا کہ نوجوان ہماری سب سے قیمتی سرمایہ ہیں اور پرامن، خوشحال اور ترقی یافتہ مستقبل کی ضمانت ہیں۔ جدید دور میں بدعنوانی کے طریقہ کار میں تبدیلیاں آ رہی ہیں، اس لیے نوجوانوں کی شمولیت سے اس ناسور کو مؤثر انداز میں ختم کیا جا سکتا ہے۔

شہباز شریف نے مزید کہا کہ انسداد بدعنوانی کا عالمی دن دنیا بھر کے افراد کو بدعنوانی کے مضر اثرات سے آگاہ ہونے اور بدعنوانی سے پاک معاشرہ قائم کرنے کا موقع فراہم کرتا ہے۔ انہوں نے بتایا کہ مالی بدعنوانی نہ صرف انتظامیہ کو کمزور کرتی ہے بلکہ عوام کی روزمرہ زندگی، معاشرتی انصاف، معیشتی ترقی اور فلاحی ریاست کے بنیادی اصولوں کو بھی متاثر کرتی ہے۔

وزیراعظم نے کہا کہ مالی بدعنوانی کے خلاف ٹھوس اقدامات حکومت کی ترجیحات میں شامل ہیں، اور قومی احتساب بیورو (نیب) سمیت تمام متعلقہ ادارے بھرپور اور تندہی کے ساتھ کارروائیاں کر رہے ہیں تاکہ ہر سطح پر جوابدہی کو یقینی بنایا جا سکے۔

انہوں نے نیب کی کوششوں کو سراہتے ہوئے کہا کہ نوجوانوں میں انسداد بدعنوانی سے متعلق آگاہی پیدا کرنا، منظم مالی جرائم سے متاثرہ شہریوں کو بروقت امداد فراہم کرنا عوام کے اعتماد کو مزید مستحکم کر رہا ہے۔

وزیراعظم نے عوام سے اپیل کی کہ وہ انسداد بدعنوانی کے عالمی دن کے موقع پر یکجہتی اور شفاف، منصفانہ اور خوشحال پاکستان کے خواب کی تکمیل کے لیے ہر ممکن اقدامات اٹھائیں اور وفاقی و صوبائی حکومتوں سمیت پورے معاشرے کی سطح پر اس جدوجہد کو مزید مؤثر بنائیں۔

خیال رہے کہ 2025 میں انسداد بدعنوانی کا عالمی دن "نوجوانوں کے ساتھ مل کر بدعنوانی کے خلاف: ایماندار، باعزت مستقبل کی بنیاد” کے عنوان کے تحت منایا جا رہا ہے، جو ہر عمر کی آبادی کی شمولیت کے ذریعے اس برائی کے خاتمے کی اہمیت کو اجاگر کرتا ہے۔