موٹروے کے دو سیکشنز شدید دھند کے باعث ٹریفک کے لیے بند

 

ملتان: شدید دھند کے باعث موٹروے کے دو اہم سیکشنز عوام کے لیے عارضی طور پر بند کر دیے گئے ہیں۔ ملتان شیر شاہ انٹرچینج سے ظاہر پیر تک موٹروے ایم 5 اور ایم ون کے پشاور سے رشکئ تک سیکشن ہر قسم کی ٹریفک کے لیے بند ہیں۔

موٹروے پولیس کے ترجمان سید عمران احمد کے مطابق موٹروے کی بندش عوام کی جان و مال کے تحفظ کے لیے کی گئی ہے۔ ایم ون کے پشاور سے اسلام آباد تک سیکشن کو بعد میں کھول دیا گیا ہے، جبکہ رشکئ سے برہان تک ٹریفک کے لیے کھلا رکھا گیا ہے۔

ترجمان نے بتایا کہ قومی شاہراہ پر بستی ملوک، لودھراں اور بہاولپور کے علاقوں میں بھی دھند کا سلسلہ جاری ہے، جس سے حدِ نگاہ شدید متاثر ہے۔ موٹروے پولیس نے ڈرائیورز کو خبردار کیا ہے کہ دھند میں لین کی خلاف ورزی سنگین حادثات کا سبب بن سکتی ہے، اس لیے لین ڈسپلن کی سختی سے پابندی کریں۔

سفر کرنے والے شہریوں کو مشورہ دیا گیا ہے کہ دن کے محفوظ اوقات صبح 10 بجے سے شام 6 بجے کے درمیان سفر کریں، فوگ لائٹس کا استعمال لازمی کریں، تیز رفتاری سے گریز کریں اور آگے چلنے والی گاڑی سے مناسب فاصلہ رکھیں۔ موٹروے پولیس نے شہریوں سے غیر ضروری سفر سے اجتناب کرنے اور رہنمائی یا مدد کے لیے ہیلپ لائن 130 پر رابطہ کرنے کی اپیل کی ہے۔