الیکشن کمیشن نے بلدیاتی انتخابات کا شیڈول جاری کر دیا

اسلام آباد: الیکشن کمیشن آف پاکستان نے وفاقی دارالحکومت اسلام آباد میں بلدیاتی انتخابات کا شیڈول جاری کرتے ہوئے 15 فروری 2026 کو پولنگ کی تاریخ مقرر کر دی ہے۔

جاری کردہ شیڈول کے مطابق پولنگ صبح 8 بجے شروع ہو کر شام 4 بجے تک بلا تعطل جاری رہے گی۔

الیکشن کمیشن کے مطابق ریٹرننگ آفیسرز کاغذاتِ نامزدگی کے لیے پبلک نوٹس 19 دسمبر کو جاری کریں گے، جبکہ امیدوار 22 سے 27 دسمبر تک اپنے کاغذات جمع کرا سکیں گے۔

شیڈول کے مطابق کاغذات نامزدگی کی جانچ پڑتال 30 دسمبر سے 3 جنوری 2026 تک مکمل کی جائے گی۔ کاغذات نامزدگی مسترد یا منظور ہونے کے بعد اپیلیں 5 سے 8 جنوری تک دائر کی جا سکیں گی، اور الیکشن ٹربیونلز ان اپیلوں کا فیصلہ 9 سے 13 جنوری کے دوران کریں گے۔

کاغذات نامزدگی واپس لینے کی آخری تاریخ 15 جنوری 2026 مقرر کی گئی ہے، جبکہ امیدواروں کی حتمی فہرست اور انتخابی نشانات 16 جنوری کو جاری کیے جائیں گے۔

الیکشن کمیشن کے مطابق پولنگ کے بعد نتائج مرتب کرنے کا عمل 16 سے 19 فروری تک مکمل کیا جائے گا۔