71 کی جنگ میں پاک بحریہ سیسہ پلائی دیوار تھی،فیلڈ مارشل عاصم منیر

ایبٹ آباد— چیف آف ڈیفنس فورسز فیلڈ مارشل سید عاصم منیر نے کہا ہے کہ 1971 کی جنگ میں پاک بحریہ دشمن کے لیے سمندر میں سیسہ پلائی دیوار ثابت ہوئی تھی اور آج بھی ملکی بحری سرحدوں کی مضبوط محافظ ہے۔ ان کا کہنا تھا کہ پاکستان اپنی خود مختاری اور دفاع وطن کے لیے ہمیشہ پُرعزم رہے گا۔

پاک بحریہ 9 دسمبر کو "ہنگور ڈے” کے طور پر مناتی ہے، جو آبدوز ہنگور کی بہادری اور پاکستان کے ناقابلِ تسخیر دفاع کی یاد دلاتا ہے۔ 1971 میں آبدوز ہنگور کے عملے نے غیر معمولی جرات اور مہارت کا مظاہرہ کرتے ہوئے ایسی تاریخ رقم کی جو آج تک دشمن کے ذہن پر نقش ہے۔ فیلڈ مارشل عاصم منیر نے کہا کہ یہ دن اس حقیقت کی یاد دہانی کراتا ہے کہ پاکستان خطے میں امن کا خواہاں ہے، مگر قومی دفاع پر کبھی سمجھوتہ نہیں کرے گا۔

اپنے خصوصی پیغام میں نیول چیف ایڈمرل نوید اشرف نے کہا کہ پاک بحریہ اپنے شاندار ماضی کی طرح آج بھی ملک کے سمندری دفاع کی پہلی مضبوط لائن ہے اور دشمن کے دانت کھٹے کرنے کے لیے ہمہ وقت تیار ہے۔ انہوں نے مزید بتایا کہ 8 جدید ہنگور کلاس آبدوزیں جلد بحری بیڑے کا حصہ بن جائیں گی، جو پاک بحریہ کی صلاحیتوں میں مزید اضافہ کریں گی۔

ہنگور ڈے کے موقع پر پاک بحریہ نے اپنی خصوصی دستاویزی فلم "ہدف” بھی جاری کر دی ہے، جس میں آبدوز ہنگور کی بہادری اور تاریخی کارنامے کو جدید انداز میں پیش کیا گیا ہے۔