ملک بھر میں شدید دھند،موٹرویز بند

ملک کے مختلف علاقوں میں شدید دھند کے باعث نظامِ زندگی متاثر ہو گیا ہے، جبکہ فضائی آلودگی میں بھی تشویشناک حد تک اضافہ ریکارڈ کیا جا رہا ہے۔ حدِ نگاہ انتہائی کم ہونے پر موٹروے پولیس نے مختلف موٹرویز کو ٹریفک کے لیے بند کر دیا ہے۔

موٹروے پولیس کے مطابق ایم ون رشکئی سے پشاور، ایم ٹو ہرن مینار سے ٹھوکر نیاز بیگ، ایم تھری فیض پور سے رجانہ، ایم فائیو ملتان سے ظاہر پیر اور روہڑی سے رحیم یار خان تک موٹروے بند کر دی گئی ہے۔ اسی طرح لاہور سیالکوٹ موٹروے مین ٹول پلازہ سے سمبڑیال تک ٹریفک معطل کر دی گئی ہے۔

موٹروے پولیس نے شہریوں کو غیر ضروری سفر سے گریز کرنے اور محتاط ڈرائیونگ کی ہدایت کی ہے۔ دوسری جانب ملک کے مختلف شہروں میں فضائی آلودگی خطرناک حد تک بڑھ گئی ہے۔

اعداد و شمار کے مطابق فیصل آباد 574 ایئر پارٹیکیولیٹ میٹر کے ساتھ ملک کا سب سے آلودہ شہر قرار دیا گیا ہے۔ عالمی ماحولیاتی ویب سائٹ کے مطابق لاہور 310 ایئر کوالٹی انڈیکس کے ساتھ دنیا کے آلودہ ترین شہروں میں دوسرے نمبر پر موجود ہے۔

محکمہ ماحولیات پنجاب کے مطابق گوجرانوالہ کا اے کیو آئی 322، حافظ آباد کا 380 جبکہ مظفرگڑھ کا 372 ریکارڈ کیا گیا ہے۔ ماہرین نے شہریوں کو احتیاطی تدابیر اختیار کرنے اور غیر ضروری طور پر گھروں سے باہر نہ نکلنے کا مشورہ دیا ہے۔