شہری کو فروری 2024 میں چوری ہونے والی موٹر سائیکل کے ای چالان موصول

لاہور ،لاہور میں ایک شہری کو فروری 2024 میں چوری ہونے والی موٹر سائیکل کے ای چالان موصول ہو گئے، حالانکہ پولیس اب تک موٹر سائیکل تلاش کرنے میں کامیاب نہیں ہو سکی۔ شہری کے مطابق چوری شدہ موٹر سائیکل لاہور کی سڑکوں پر موجود ہے، لیکن چور اب تک پکڑا نہیں گیا۔

دوسری جانب لاہور میں ٹریفک اصلاحات نے شہری زندگی پر مثبت اثرات مرتب کیے ہیں۔ موٹر وہیکل آرڈیننس میں ترمیم اور ٹریفک قوانین کے سخت نفاذ کے نتیجے میں صرف 12 روز میں مہلک حادثات کی شرح میں 47 فیصد کمی ریکارڈ کی گئی ہے۔ ٹریفک پولیس کے مطابق زیرو ٹالرنس پالیسی نے شہر میں نظم و ضبط بہتر بنایا اور حادثات کی روک تھام میں کلیدی کردار ادا کیا۔

چیف ٹریفک آفیسر لاہور ڈاکٹر اطہر وحید نے بتایا کہ قوانین پر عمل درآمد یقینی بنانے کے لیے بغیر کسی تفریق کے کارروائی کی گئی، اور 12 روز میں ایک لاکھ سے زائد شہریوں کو مختلف خلاف ورزیوں پر چالان جاری کیے گئے۔ شہر بھر کے سگنلز پر میگا فون کے ذریعے شہریوں کو قوانین کی پاسداری کے لیے آگاہی مہم بھی چلائی گئی۔

ڈاکٹر اطہر وحید نے شہریوں پر زور دیا کہ ٹریفک قوانین پر مکمل عمل ہی حادثات سے محفوظ رہنے کا واحد راستہ ہے۔