ایف سی ہیڈکوارٹر حملہ،سہولت کاروں اور نیٹ ورک کا سراغ مل گیا

پشاور،پشاور میں ایف سی ہیڈکوارٹرز پر خودکش حملہ کرنے والے دہشتگرد نیٹ ورک کی نشاندہی کر لی گئی ہے۔ تفتیشی حکام کے مطابق خودکش حملہ آور کالعدم دہشت گرد تنظیم سے تعلق رکھتے تھے اور انہوں نے پشاور میں چند روز قیام کرتے ہوئے شہر کے راستوں سے واقفیت حاصل کی۔

حکام کے مطابق خودکش جیکٹس اور رہائش کی فراہمی میں بھی دہشتگردوں کی سہولت کاری کی گئی تھی۔ ایف سی ہیڈکوارٹر پر حملے کے کیس سے متعلق اب تک 150 سے زائد افراد سے تفتیش کی جا چکی ہے۔

گزشتہ ماہ ہونے والے حملے میں 3 اہلکار شہید اور 5 زخمی ہوئے تھے، جبکہ خودکش بمبار سمیت 3 حملہ آور مارے گئے تھے۔ تفتیشی حکام اس نیٹ ورک کے دیگر ممکنہ عناصر کی شناخت اور گرفتاری کے لیے کارروائیاں جاری رکھے ہوئے ہیں۔