لاہور سیالکوٹ موٹروے ایم 11 شدید دھند کے باعث عارضی طور پر بند

لاہور سیالکوٹ موٹروے ایم 11 کو شدید دھند کے باعث عارضی طور پر بند کر دیا گیا ہے۔ موٹروے پولیس کے ترجمان سید عمران احمد کے مطابق موٹرویز کی بندش کا فیصلہ شہریوں کی جان و مال کے تحفظ کو مدنظر رکھتے ہوئے کیا گیا ہے۔

ترجمان کا کہنا ہے کہ دھند کے دوران لین کی خلاف ورزی سنگین ٹریفک حادثات کا سبب بن سکتی ہے، اس لیے تمام روڈ یوزرز لین ڈسپلن پر سختی سے عمل کریں۔ انہوں نے شہریوں کو ہدایت کی کہ غیر ضروری سفر سے گریز کریں اور ممکن ہو تو دن کے اوقات میں سفر کو ترجیح دیں۔

موٹروے پولیس کے مطابق دھند میں محفوظ سفری اوقات صبح 10 بجے سے شام 6 بجے تک ہیں۔ ڈرائیور حضرات فوگ لائٹس کا استعمال لازمی کریں، تیز رفتاری سے اجتناب کریں اور آگے چلنے والی گاڑی سے مناسب فاصلہ رکھیں۔

ترجمان نے مزید کہا کہ کسی بھی قسم کی رہنمائی یا ہنگامی مدد کے لیے موٹروے پولیس کی ہیلپ لائن 130 پر رابطہ کیا جا سکتا ہے۔