بالائی علاقوں میں 13 سے 18 دسمبر بارش اور برف باری کا امکان

نیشنل ڈیزاسٹر منیجمنٹ اتھارٹی (این ڈی ایم اے) نے ملک کے بالائی علاقوں میں بارش اور برف باری کی پیش گوئی کرتے ہوئے ایڈوائزری جاری کر دی ہے۔ این ڈی ایم اے کے نیشنل ایمرجنسی آپریشن سینٹر کے مطابق 13 سے 18 دسمبر 2025 کے دوران بالائی خیبر پختونخواہ، کوہستان، گلگت بلتستان، آزاد جموں و کشمیر اور بلوچستان کے بعض علاقوں میں بارش اور برف باری کا امکان ہے۔

ایڈوائزری میں بتایا گیا ہے کہ 13 سے 15 دسمبر کے دوران مغربی ہواؤں کا سلسلہ شمالی و مغربی پاکستان کے مختلف علاقوں میں اثر انداز ہو گا۔ ممکنہ موسمی صورتحال کے باعث دھند کی شدت میں بھی اضافہ ہو سکتا ہے۔ میدانی علاقوں میں ہلکی سے درمیانی بارش متوقع ہے، جبکہ پہاڑی اور بالائی علاقوں میں برف باری کی پیش گوئی کی گئی ہے۔ کوہستان، بالائی خیبر پختونخواہ، گلگت بلتستان اور آزاد کشمیر کے پہاڑی علاقوں میں شدید برف باری کا امکان ہے۔

این ڈی ایم اے نے خبردار کیا ہے کہ برف باری کے باعث پہاڑی راستوں پر ٹریفک کی روانی متاثر ہو سکتی ہے اور بعض مقامات پر سڑکیں بند ہونے کا خدشہ بھی ہے۔ کوئٹہ، زیارت اور شمال مغربی بلوچستان کے پہاڑی علاقوں میں بھی ہلکی بارش اور برف باری متوقع ہے۔

ایڈوائزری میں مزید کہا گیا ہے کہ 16 سے 18 دسمبر کے دوران برف باری کی شدت میں کمی ہو سکتی ہے، تاہم سردی کی شدت برقرار رہے گی۔ بالائی علاقوں میں برفباری کے باعث سڑکوں پر پھسلن کے خطرات رہیں گے اور شمالی علاقوں میں متعدد مقامات پر وقفے وقفے سے ہلکی برف باری متوقع ہے۔

این ڈی ایم اے نے سیاحوں اور مسافروں سے اپیل کی ہے کہ پہاڑی علاقوں کے غیر ضروری سفر سے گریز کریں اور مقامی انتظامیہ کی ہدایات پر عمل کریں۔ این ڈی ایم اے ممکنہ موسمی صورتحال اور خطرات کے حوالے سے متعلقہ اداروں کو پیشگی آگاہی بھی فراہم کر رہا ہے۔