صدر و وزیراعظم پاکستان کی سڈنی فائرنگ واقعے کی مذمت

پاکستان نے آسٹریلیا کے شہر سڈنی میں پیش آنے والے فائرنگ کے واقعے کی شدید الفاظ میں مذمت کی ہے اور ہلاک و زخمی ہونے والوں کے لیے گہرے رنج و افسوس کا اظہار کیا ہے۔

صدر مملکت آصف زرداری نے واقعے کے متاثرین سے ہمدردی کا اظہار کرتے ہوئے کہا کہ پاکستان خود دہشت گردی کے شدید اثرات کا سامنا کر چکا ہے اور ایسے حملوں سے معاشروں کو پہنچنے والے درد و صدمے کو بخوبی سمجھتا ہے۔ صدر نے آسٹریلوی حکومت اور عوام کے ساتھ مکمل یکجہتی کا اظہار کرتے ہوئے دہشت گردی کی تمام شکلوں کے خلاف پاکستان کے اصولی موقف کو دہرایا۔

وزیر اعظم شہباز شریف نے بھی واقعے پر ردعمل دیتے ہوئے کہا کہ پاکستان ہر قسم کے دہشت گردانہ حملے کی مذمت کرتا ہے اور مشکل کی اس گھڑی میں متاثرہ خاندانوں، آسٹریلوی حکومت اور عوام کے ساتھ کھڑا ہے۔

نائب وزیر اعظم اسحاق ڈار اور وفاقی وزیر داخلہ محسن نقوی نے بھی اس دہشت گردانہ واقعے کی مذمت کرتے ہوئے آسٹریلوی حکومت اور عوام سے دلی تعزیت کا اظہار کیا۔ وزیر داخلہ نے پیغام میں کہا کہ دہشت گردی انسانیت کے خلاف ناقابل معافی جرم ہے اور پاکستان کو بھی اس خطرے کا سامنا ہے، لہٰذا ہم آسٹریلوی عوام کے دکھ و درد کو سمجھتے ہیں۔

یاد رہے کہ سڈنی کے مشہور بونڈی بیچ پر دو مسلح افراد نے شہریوں پر فائرنگ کی، جس کے نتیجے میں 16 افراد ہلاک اور 40 زخمی ہوئے۔ پولیس کی جوابی کارروائی میں ایک حملہ آور مارا گیا اور دوسرے کو زخمی حالت میں حراست میں لے لیا گیا۔