پاک بحریہ کا فضا تک مار کرنے والے میزائل کے فائر پاور کا شاندار مظاہرہ

کراچی: پاک بحریہ نے بحیرہ عرب میں سطح آب سے فضا تک مار کرنے والے میزائل کے فائر پاور کا شاندار مظاہرہ کیا ہے۔

پاک بحریہ کے ترجمان کے مطابق شمالی بحیرہ عرب میں ایف ایم 90 این ای آر میزائل کی کامیاب لائیو فائرنگ کے ذریعے اپنی جنگی صلاحیت اور آپریشنل تیاری کا عملی مظاہرہ کیا گیا۔ فائر پاور کے دوران انتہائی تیزی سے فضائی اہداف کو کامیابی کے ساتھ نشانہ بنایا گیا، جس سے پاک بحریہ کی آپریشنل صلاحیت اور حربی تیاری واضح ہوئی۔

کمانڈر پاکستان فلیٹ ریئر ایڈمرل عبد المنیب نے فائر پاور ڈسپلے کا مشاہدہ کیا اور پاک بحریہ کی تیاری پر اطمینان کا اظہار کیا۔ انہوں نے فائرنگ میں حصہ لینے والے افسران اور جوانوں کی پیشہ ورانہ مہارت، عزم اور لگن کو سراہا۔

کمانڈر پاکستان فلیٹ نے کہا کہ پاک بحریہ ہر صورت ملکی سمندری دفاع اور قومی بحری مفادات کے تحفظ کے لیے پرعزم ہے اور کسی بھی چیلنج سے نمٹنے کے لیے ہمہ وقت تیار ہے۔