نادرا نے ب فارم پر تاریخ پیدائش کی ترمیم کی سہولت آن لائن فراہم کر دی

نیشنل ڈیٹا بیس اینڈ رجسٹریشن اتھارٹی (نادرا) نے شہریوں کو ب فارم پر تاریخ پیدائش میں ترمیم کروانے کی سہولت فراہم کر دی ہے۔ ب فارم، جسے چائلڈ رجسٹریشن سرٹیفکیٹ (CRC) بھی کہا جاتا ہے، پاسپورٹ حاصل کرنے، اسکول میں داخلے اور بچوں کے بین الاقوامی سفر کے لیے ایک اہم دستاویز ہے۔

نادرا نے اپنے آن لائن سسٹم کو اپ ڈیٹ کیا ہے جس کے ذریعے والدین اب نادرا دفاتر کا دورہ کیے بغیر ب فارم کیلیے درخواست جمع کرا سکتے ہیں۔ اس اقدام سے طویل قطاروں کا خاتمہ ہوا ہے اور رجسٹریشن کے عمل کو آسان بنایا گیا ہے۔ اب درخواستیں پاک آئی ڈی ایپ کے ذریعے بھی جمع کروائی جا سکتی ہیں۔

نادرا نے ب فارم پر تاریخ پیدائش درست کرنے کا طریقہ کار بھی واضح کیا ہے۔ سوشل میڈیا پر پوچھے گئے سوال کے جواب میں کہا گیا کہ اگر کمپیوٹرائزڈ برتھ سرٹیفکیٹ کی بنیاد پر ب فارم جاری ہوا ہے تو والدین کو پہلے متعلقہ یونین کونسل سے تاریخ پیدائش کی درستگی کروانی ہوگی۔

دوسرا طریقہ یہ ہے کہ شہری صحیح تاریخ پیدائش کے درست ثبوت کے ساتھ نادرا رجسٹریشن سینٹر جا سکتے ہیں۔ قابل قبول دستاویزات میں اصل سفری دستاویزات، تعلیمی سرٹیفکیٹ، سروس ریکارڈ یا میڈیکل ریکارڈ شامل ہیں۔

نادرا نے شہریوں کو مشورہ دیا ہے کہ کسی بھی تصحیح کی درخواست دینے سے پہلے تمام دستاویزات درست اور تصدیق شدہ ہوں تاکہ کارروائی میں تاخیر سے بچا جا سکے۔