وفاقی حکومت کے پہلے 20 ماہ  میں قرضوں کی تفصیلات سامنے آگئیں

اسلام آباد: وفاقی حکومت کے پہلے 20 ماہ کے دوران لیے جانے والے قرضوں کی تفصیلات سامنے آگئیں ہیں۔ موجودہ حکومت کے ابتدائی 20 مہینوں میں وفاقی قرضوں میں مجموعی طور پر 12 ہزار 169 ارب روپے کا اضافہ ریکارڈ کیا گیا، جو مارچ 2024 سے اکتوبر 2025 کے دوران ہوا۔

اسٹیٹ بینک آف پاکستان کی دستاویزات کے مطابق مارچ 2024 سے اکتوبر 2025 کے دوران وفاقی حکومت کے مقامی قرضے میں 11 ہزار 300 ارب روپے اور بیرونی قرضے میں 869 ارب روپے کا اضافہ ہوا، جس کے بعد وفاقی حکومت کا مجموعی قرضہ اکتوبر 2025 تک 76 ہزار 979 ارب روپے تک پہنچ گیا۔ اس کے مقابلے میں فروری 2024 تک وفاقی حکومت کا مجموعی قرضہ 64 ہزار 810 ارب روپے تھا۔

مزید تفصیلات کے مطابق فروری 2024 تک مرکزی حکومت کا مقامی قرضہ 42 ہزار 675 ارب روپے تھا جو اکتوبر 2025 تک بڑھ کر 53 ہزار 975 ارب روپے ہو گیا۔ اسی طرح فروری 2024 تک وفاقی حکومت کا بیرونی قرضہ 22 ہزار 134 ارب روپے تھا اور اکتوبر 2025 تک یہ 23 ہزار ارب روپے سے تجاوز کر چکا ہے۔