ڈیزل قیمتوں میں کمی کے بعد ٹرانسپورٹ کرایوں میں کمی کی ہدایات جاری

لاہور: صوبائی وزیر ٹرانسپورٹ بلال اکبر خان نے ڈیزل کی قیمتوں میں کمی کے بعد ٹرانسپورٹ کرایوں میں کمی کی ہدایات جاری کر دی ہیں۔

صوبائی وزیر نے افسران کو ہدایت کی کہ پیٹرولیم مصنوعات کی قیمتوں کے مطابق کرایوں کی نئی لسٹ ہر ضلع میں جاری کی جائے اور کرایوں میں کمی کے لیے ٹیمیں تشکیل دی جائیں۔

انہوں نے زائد کرایہ وصول کرنے والے ٹرانسپوٹرز کے خلاف سخت کارروائی کرنے، متعلقہ حکام کو رپورٹ دینے اور زائد رقم مسافروں کو واپس کرانے کی بھی ہدایت کی۔

بلال اکبر خان نے کہا کہ ڈیزل کی قیمتوں میں کمی کا براہِ راست فائدہ عوام کو پہنچایا جائے گا اور زائد کرایہ لینے والوں سے کسی بھی صورت رعایت نہیں دی جائے گی۔