ایبٹ آباد : بیرون ملک سے پاکستان آ ئے نوجوان کی پراسرار موت، ورثا کا قتل کا شبہ

نویداکرم عباسی:ایبٹ آباد  : بیرون ملک سے پاکستان آنیوالے نوجوان کی اسلام آباد میں موت کا معاملہ نیا رخ اختیار کر گیا، ورثا کے مطابق فرحان کو قتل کیا گیا ہے، پولیس نے قبر کشائی کرکے  لاش کا پوسٹ مارٹم کر کے تحقیقات شرو ع کر دیں۔

تفصیلات کے مطابق ایبٹ آباد تھانہ سٹی کی حدود پاوا گائوں  کے رہائشی فرحان جدون ولد فہیم جدون کی اسلام آباد میں پرسرارموت کا معاملہ نیا رخ اختیار کر گیا، نوجوان فرحان خان جدون ولد فہیم خان جدون  فرحان حال ہی میں  اپنی بیوی کے ہمراہ نیدرلینڈ سے واپس آیا تھا اور اپنی بیوی کے ہمراہ اسلام آباد تھانہ شمس کالونی کی حدود میں واقع فلیٹ میں رہاش پذیر تھا۔

گزشتہ اتوار کو  ابرار نامی شخص کیجانب سے مبینہ طور پر ایک لاش کی تدفین پاوا گائوں میں کی گئی تھی اور یہ سارا عمل بلکل خاموشی سے کیا گیا جس پر علاقہ کے عوام کو شک ہوا تواسلام آباد پولیس کی زیر نگرانی قبر کشائی کے بعد لاش کا پوسٹمارٹم کرنے کے علاوہ فرانزک کیلیے نمونے اکٹھے کر لیے گئے جنہیں ٹیسٹ کیلیے لیبارٹری بھیج دیا گیا۔

متوفی کے بھائی عیان جدون ولد فہیم خان جدون کی مدعیت میں تھانہ شمس کالونی اسلام آباد میں قتل کا مقدمہ درج کر لیا گیا ہے اور معاملے کی مزید تحقیقات شروع کر دی گئی ہیں۔ پولیس کے مطابق مرنے والے نوجوان فرحان کے ورثا کو شک ہے کہ اس کی طبعی موت نہیں ہوئی جس پر ورثا نے تحقیقات کا مطالبہ کیا۔

7دسمبر کے مذکورہ واقعہ کے بعد بدھ کے روز اسلام آباد پولیس کی موجودگی میں اسلام آباد سے آنیوالی ٹیم نے لاش کا پوسٹمارٹم کیا اور لاش سے فرانزک ٹیسٹ کیلئے مختلف نمونے حاصل کیے،پولیس کے مطابق رپورٹ  آنے بعد موت کی اصل وجہ سامنے آ سکے گی۔