پنجاب کے مختلف علاقوں میں شدید دھند کے باعث حدِ نگاہ صفر

لاہور ،پنجاب کے مختلف علاقوں میں شدید دھند کے باعث حدِ نگاہ بری طرح متاثر ہو گئی ہے، جس کے نتیجے میں موٹرویز کو مختلف مقامات سے عارضی طور پر بند کر دیا گیا ہے۔ موٹروے پولیس کے مطابق دھند کی شدت کے پیش نظر حفاظتی اقدامات کے طور پر ٹریفک کو روکا گیا ہے۔

موٹروے ایم ٹو ٹھوکر نیاز بیگ سے للہ انٹرچینج تک جبکہ موٹروے ایم تھری فیض پور سے سمندری تک بند کر دی گئی ہے۔ اسی طرح موٹروے ایم فور شیر شاہ سے پنڈی بھٹیاں، موٹروے ایم فائیو شیر شاہ سے ظاہر پیر اور موٹروے ایم الیون لاہور سے سمبڑیال تک ہر قسم کی ٹریفک کے لیے بند ہے۔

مزید برآں موٹروے ایم فائیو ظاہر پیر سے روہڑی تک بھاری گاڑیوں کی آمد و رفت بھی روک دی گئی ہے۔ شدید دھند کے باعث قومی شاہراہوں پر بھی ٹریفک کی روانی متاثر ہونے کی اطلاعات ہیں۔

موٹروے پولیس نے شہریوں کو ہدایت کی ہے کہ دھند کے دوران غیر ضروری سفر سے گریز کریں، رفتار کم رکھیں اور دورانِ سفر فوگ لائٹس کا استعمال یقینی بنائیں تاکہ کسی بھی ناخوشگوار واقعے سے بچا جا سکے۔