ورلڈ بینک کا پاکستان کیلئے 1.35 ارب ڈالر مالی معاونت کا اعلان

ورلڈ بینک نے پاکستان کیلئے 1.35 ارب ڈالر مالی معاونت فراہم کرنے کا اعلان کردیا ہے۔

خبر رساں ادارے رائٹرز کے مطابق یہ مالی معاونت ایم پی اے پروگرام کے تحت دی جائے گی، جس کا مقصد پاکستان کی معیشت کو مستحکم کرنا اور اہم ترقیاتی منصوبوں کی تکمیل میں مدد فراہم کرنا ہے۔

ورلڈ بینک کی جانب سے جاری بیان میں کہا گیا کہ پاکستان کو درپیش مالی چیلنجز، بڑھتے ہوئے مالی دباؤ اور ترقیاتی ضروریات کے پیش نظر یہ مالی پیکج انتہائی اہمیت کا حامل ہے۔ فراہم کی جانے والی رقم حکومتی اصلاحاتی اقدامات کو تقویت دے گی اور پائیدار اقتصادی ترقی کے اہداف حاصل کرنے میں مددگار ثابت ہوگی۔

ماہرین معاشیات کا کہنا ہے کہ ورلڈ بینک کی یہ معاونت ایسے وقت میں سامنے آئی ہے جب پاکستان کو زرمبادلہ کے ذخائر، مالی خسارے اور مہنگائی جیسے مسائل کا سامنا ہے۔ عالمی مالیاتی اداروں کی مدد سے سرمایہ کاروں کا اعتماد بحال ہوگا اور حکومت کو اصلاحاتی ایجنڈا آگے بڑھانے میں سہولت ملے گی۔

حکومتی ذرائع کے مطابق پاکستان اور ورلڈ بینک کے درمیان طویل عرصے سے شراکت داری قائم ہے اور ماضی میں بھی مختلف منصوبوں کے لیے مالی اور تکنیکی معاونت فراہم کی جاتی رہی ہے۔ موجودہ پیکج کو اسی تسلسل کی کڑی قرار دیا جا رہا ہے، جس سے ملک میں ترقیاتی سرگرمیوں کو فروغ ملنے کی توقع ہے۔