راولپنڈی میں یوم شہدا گکھڑ پلازہ آتشزدگی پریادگاری تقریب کا انعقاد

ریسکیو 1122 راولپنڈی کے زیرِ اہتمام سانحہ گگھٹر پلازہ کی یاد میں ریسکیویوم شہدا نہایت عقیدت و احترام کے ساتھ منایا گیا۔ اس موقع پر یادگارِ شہدا پر ایک پروقار تقریب منعقد ہوئی جس میں اعلیٰ حکام، ریسکیو افسران اور ریسکیورز کی بڑی تعداد نے شرکت کی۔تقریب میں پارلیمانی سیکرٹری ریسکیو 1122 پنجاب ضیاء اللہ شاہ، ڈائریکٹر ریسکیو راولپنڈی ریجن ڈاکٹر فیصل محمود، ڈائریکٹر جنرل ایمرجنسی سروسز اسلام آباد ڈاکٹر عبد الرحمن خصوصی طور پر موجود تھے۔ ڈی او ایمرجنسی راولپنڈی انجینئر صبغت اللہ سمیت ریسکیو 1122 کے افسران اور ریسکیورز نے بھی بھرپور شرکت کی۔

یوم شہداکی تقریب کے دوران یادگارپر پھولوں کی چادر چڑھائی گئی، شہداء کو سلامی پیش کی گئی اور بلندی درجات کے لیے خصوصی دعا کی گئی۔ مقررین نے اپنے خطاب میں کہا کہ ریسکیو شہداء قوم کے حقیقی ہیرو ہیں جنہوں نے شہریوں کی جان و مال کے تحفظ کے لیے اپنی قیمتی جانوں کا نذرانہ پیش کیا۔مقررین کا کہنا تھا کہ 20 دسمبر 2008 کو سانحہ آتشزدگی کے دوران 13 فائر فائٹرز نے اپنی جانیں قربان کیں۔ سانحہ میں ریسکیو 1122 راولپنڈی، پی او ایف واہ کینٹ، سول ایوی ایشن اور فائر بریگیڈ کے اہلکار شہید ہوئے۔

مزید پڑھیں: ’’راولپنڈی میں فائرفائٹنگ کی تاریخ بدل گئی‘‘۔17سال پرانے سانحہ کی یادیں

تقریب سے خطاب کرتے ہوئے مقررین نے اس عزم کا اظہار کیا کہ ریسکیو 1122 شہداء کے مشن کو جاری رکھتے ہوئے عوامی خدمت کا سفر پوری قوت کے ساتھ جاری رکھے گا اور ایمرجنسی رسپانس کو مزید مؤثر بنایا جائے گا۔ انہوں نے بلند و بالا عمارتوں میں حفاظتی انتظامات یقینی بنانے، پنجاب کمیونٹی سیفٹی بلڈنگ ریگولیشنز 2022 پر مکمل عملدرآمد اور مستقبل میں آتشزدگی جیسے سانحات سے بچاؤ کے لیے احتیاطی اقدامات کو ناگزیر قرار دیا۔

آخر میں شرکاء نے شہداء کی قربانیوں کو خراجِ تحسین پیش کرتے ہوئے کہا کہ قوم ہمیشہ اپنے ان بہادر سپوتوں کو یاد رکھے گی۔