کیڈٹ کالج ورسک میں یومِ والدین کی پروقار تقریب

پشاور: کیڈٹ کالج ورسک میں یومِ والدین کی پروقار تقریب کا انعقاد کیا گیا، جس میں کیڈٹس کے والدین، عسکری اور سول حکام نے بڑی تعداد میں شرکت کی۔

تقریب کے مہمان خصوصی کور کمانڈر پشاور تھے، جنہیں کیڈٹس کے چاک و چوبند دستے نے سلامی پیش کی۔ مہمان خصوصی نے خطاب کرتے ہوئے طلباء کو نصابی اور غیر نصابی سرگرمیوں میں اپنی تمام توانائی اعلیٰ تعلیم کے حصول پر مرکوز کرنے کی ہدایت کی۔

نصاب اور سرگرمیوں میں نمایاں کارکردگی دکھانے والے کیڈٹس میں انعامات اور ٹرافیاں تقسیم کی گئیں۔ کیڈٹ عکاشہ بنگش نے پہلی جبکہ کیڈٹ عزیر رحمان نے دوسری پوزیشن حاصل کی۔ تقریب کے دوران جمناسٹک، گھڑسواری اور دیگر سرگرمیوں کا عملی مظاہرہ بھی پیش کیا گیا۔

کیڈٹ کالج ورسک کا قیام 2009 میں عمل میں آیا اور یہ ادارہ اپنے تعلیمی معیار کے لیے ملک میں نمایاں مقام رکھتا ہے۔ کالج سے فارغ التحصیل طلباء ملک کے مختلف شعبہ ہائے زندگی میں اپنی صلاحیتوں کا لوہا منوا رہے ہیں۔