صدر زرداری کی بغداد میں زیارات مقدسہ پر حاضری

صدرِ مملکت آصف علی زرداری نے عراق کے دارالحکومت بغداد میں زیاراتِ مقدسہ پر حاضری دی اور امتِ مسلمہ کے امن، اتحاد اور خوشحالی کے لیے خصوصی دعائیں کیں۔

صدر زرداری نے حضرت شیخ عبدالقادر جیلانیؒ کے مزار پر فاتحہ خوانی کی اور دعا کی۔ بعد ازاں انہوں نے کاظمیہ مقدسہ میں امامِ موسیٰ الکاظمؒ اور امامِ محمد التقیٰ الجوادؒ کے روضوں پر حاضری دی، جہاں انہوں نے امتِ مسلمہ کے اتحاد، عالمی امن اور اسلامی ممالک کی ترقی و خوشحالی کے لیے دعا کی۔ صدر مملکت نے زائرین کی کتاب میں اپنے تاثرات بھی قلمبند کیے اور ائمہ اہلِ بیتؑ کی تعلیمات کو علم، صبر، حکمت اور اعلیٰ اخلاقی اقدار کا سرچشمہ قرار دیا۔

اس کے علاوہ صدر زرداری نے امامِ اعظم ابو حنیفہؒ کے مزار پر بھی حاضری دی اور فاتحہ خوانی کرتے ہوئے امام ابو حنیفہؒ کی اسلامی فقہ، علم اور رواداری کے فروغ میں خدمات کو خراجِ تحسین پیش کیا۔

دورے کے دوران صدر مملکت نے مختلف مزارات کے منتظمین اور مبلغین سے ملاقاتیں کیں اور زیاراتِ مقدسہ کے انتظامات پر اطمینان کا اظہار کیا۔

یہ دورہ صدر زرداری کے بین المذاہب ہم آہنگی، اسلامی ورثے سے وابستگی اور امتِ مسلمہ کے اتحاد کے عزم کی واضح عکاسی کرتا ہے۔