اسامہ بن لادن کی کتاب تقسیم کرنے والے ملزم کی ضمانت منظور

اسلام آباد: سپریم کورٹ نے نفرت انگیز مواد پھیلانے کے الزام میں گرفتار ملزم سید محمد کی ضمانت منظور کر لی۔

جسٹس نعیم اختر افغان کی سربراہی میں دو رکنی بینچ نے سماعت کی، جس دوران عدالت نے استفسار کیا کہ آیا ملزم سے صرف کتاب برآمد ہوئی یا اس کی تقسیم کا بھی کوئی ثبوت موجود ہے۔ پراسیکیوٹر کے مطابق ملزم اسامہ بن لادن سے متعلق کتاب کی تقسیم میں ملوث تھا اور اس کے موبائل فون سے بھی نفرت انگیز مواد ملا۔

وکیلِ صفائی نے بتایا کہ ملزم ساہیوال میں محنت مزدوری کرتا ہے اور فروری 2025 میں سی ٹی ڈی لاہور نے اسے گرفتار کیا تھا۔ عدالت نے کہا کہ کیس میں صرف چار گواہان ہیں اور زیادہ سے زیادہ سزا پانچ سال ہے، لہٰذا ضمانت منظور کی جاتی ہے اور ٹرائل میں شواہد پیش کرنے پر فیصلہ کیا جائے گا۔