خیبر پختونخوا، آزاد کشمیر اور جی بی میں برفباری،وادیاں سفید ہو گئیں

خیبر پختونخوا، آزاد کشمیر اور گلگت بلتستان کے پہاڑی علاقوں میں وقفے وقفے سے برفباری کا سلسلہ جاری ہے جس کے باعث وادیاں اور بلند پہاڑ سفید چادر میں ڈھک گئے ہیں۔

خیبر پختونخوا کے ضلع دیر میں سیاح بڑی تعداد میں برفباری سے لطف اندوز ہونے کے لیے لواری ٹنل پہنچ گئے۔ سوات، کالام، مالم جبہ اور گردونواح میں ہونے والی برفباری کے بعد ہر طرف برف کی سفیدی چھا گئی، جس سے موسم نہایت خوشگوار ہو گیا۔

ایبٹ آباد اور گلیات کے مختلف علاقوں میں ہلکی بارش ہوئی، جس کے باعث درجہ حرارت میں نمایاں کمی اور سردی کی شدت میں اضافہ ریکارڈ کیا گیا۔ پشاور سمیت صوبے کے دیگر اضلاع میں بھی بادل برسنے سے موسم سرد ہو گیا۔

آزاد کشمیر کی وادی نیلم کے بالائی علاقوں میں برفباری کے بعد وادیاں مکمل طور پر سفید ہو گئیں۔ اپر نیلم، اڑنگ کیل اور دیگر مقامات پر وقفے وقفے سے برفباری جاری ہے۔

گلگت بلتستان کے ضلع چلاس کے بالائی علاقوں میں بھی گزشتہ رات سے برفباری کا سلسلہ جاری ہے، جس کے باعث سردی کی شدت میں مزید اضافہ ہو گیا ہے اور معمولات زندگی متاثر ہو رہے ہیں۔